امت نیوز ڈیسک //
ایک پاکستانی حکومتی ذریعے کے مطابق امریکہ اور ایران کے درمیان اعلیٰ سطحی مذاکرات کا اگلا دور بہت جلد اسلام آباد میں منعقد ہوگا۔
ذرائع کے مطابق امریکی صدر ٹرمپ چاہتے ہیں کہ ایران کے ساتھ معاہدہ اگلے ماہ چین کے دورے سے پہلے طے پا جائے۔ ملاقات کی حتمی تاریخ ابھی سامنے نہیں آئی، تاہم یہ واضح ہے کہ مذاکرات جلد ہوں گے۔
مذاکرات میں دونوں ممالک کے اعلیٰ سطح کے حکام شریک ہوں گے، جبکہ شرکاء کے نام تاحال طے نہیں کیے گئے۔ دونوں فریقین کے درمیان مطالبات اور رعایتوں سے متعلق تحریری مسودے پہلے ہی ایک دوسرے کو دیے جا چکے ہیں۔
امریکی نشریاتی ادارے سی این این کے مطابق ٹرمپ انتظامیہ ایرانی قیادت کے ساتھ جنگ بندی ختم ہونے سے قبل ایک اور براہِ راست ملاقات پر بھی غور کر رہی ہے، تاہم اس حوالے سے حتمی فیصلہ نہیں ہوا۔
واضح رہے کہ حالیہ مذاکرات، جو اسلام آباد میں منعقد ہوئے تھے، کسی حتمی معاہدے کے بغیر ختم ہو گئے تھے۔ یہ مذاکرات 8 اپریل کو پاکستان کی جانب سے کروائی گئی دو ہفتوں کی جنگ بندی کے بعد شروع ہوئے تھے۔ یہ 1979 کے بعد امریکہ اور ایران کے درمیان اعلیٰ سطح کا اہم ترین رابطہ قرار دیا جا رہا ہے، تاہم کئی بنیادی اختلافات اب بھی موجود ہیں۔
ذرائع کے مطابق مزید مذاکرات کے لیے جنیوا اور اسلام آباد دونوں مقامات زیر غور ہیں۔ امریکی حکام کو امید ہے کہ سفارتی حل ممکن ہے، اور اگر ضرورت پڑی تو جاری جنگ بندی میں توسیع بھی کی جا سکتی ہے تاکہ معاہدہ طے کرنے کے لیے مزید وقت حاصل کیا جا سکے۔
