امت نیوز ڈیسک //
ہماچل پردیش :جموں و کشمیر کانگریس کے متعدد رہنماؤں نے پارٹی ہائی کمان سے مطالبہ کیا ہے کہ وہ جموں و کشمیر نیشنل کانفرنس (این سی) کے ساتھ جاری اتحاد پر نظرثانی کرے، اور اسے فوری طور پر ختم کرنے پر غور کیا جائے۔
یہ مطالبہ کانگریس کے ضلع صدور کی جانب سے کانگڑا میں منعقدہ 10 روزہ تربیتی کیمپ "سنگٹھن سرجن ابھیان” کے دوران سامنے آیا، جس میں لوک سبھا میں اپوزیشن لیڈر راہول گاندھی اور دیگر سینئر قائدین بھی شریک تھے۔
ذرائع کے مطابق جے اینڈ کے کے تمام اضلاع کے صدور نے تحریری طور پر شکایت کی کہ این سی کے ساتھ اتحاد کانگریس کے حق میں نہیں رہا اور یہ ایک غیر متوازن سیاسی بندوبست ثابت ہوا ہے۔
رہنماؤں نے کہا کہ “زمینی سطح پر این سی کی کارکردگی سے عوامی ناراضگی بڑھ رہی ہے، جس کا نقصان کانگریس کو بھی اٹھانا پڑ رہا ہے۔ اگر یہ اتحاد جاری رہا تو پارٹی کو مزید سیاسی نقصان ہوگا۔”
انہوں نے یہ بھی الزام لگایا کہ این سی وزراء نے کانگریس کے کارکنوں اور منتخب نمائندوں کو مناسب سیاسی جگہ اور عزت نہیں دی، جس سے پارٹی کی تنظیمی صورتحال متاثر ہو رہی ہے۔
واضح رہے کہ کانگریس اور نیشنل کانفرنس نے 2024 کے جموں و کشمیر اسمبلی انتخابات میں اتحاد کے ساتھ حصہ لیا تھا اور 90 رکنی ایوان میں مجموعی طور پر 48 نشستیں حاصل کی تھیں، جن میں این سی کی 42 اور کانگریس کی 6 نشستیں شامل ہیں۔ بی جے پی نے 29 نشستیں حاصل کی تھیں۔
