امت نیوز ڈیسک //
کولکاتا، 21 جون 2026: وزیرِ اعظم مودی نے عالمی یومِ یوگا کے موقع پر کہا ہے کہ یوگا نہ صرف جسمانی اور ذہنی صحت کے لیے مفید ہے بلکہ دنیا میں امن کے قیام کی راہ بھی ہموار کر سکتا ہے۔
کولکاتا کے ریڈ روڈ پر منعقدہ 12ویں عالمی یومِ یوگا تقریب سے خطاب کرتے ہوئے مودی نے کہا کہ جدید طرزِ زندگی میں توازن برقرار رکھنا ایک بڑا چیلنج بن چکا ہے، جبکہ یوگا انسان کو متوازن زندگی گزارنے کا طریقہ سکھاتا ہے۔
انہوں نے بھگوت گیتا کا حوالہ دیتے ہوئے کہا کہ مناسب کام، متوازن غذا اور مکمل نیند ایک صحت مند زندگی کی بنیاد ہیں، اور یوگا اس توازن کو حاصل کرنے میں مدد دیتا ہے۔
وزیرِ اعظم نے کہا کہ یوگا صرف جسمانی ورزش نہیں بلکہ ذہنی سکون، اندرونی ہم آہنگی اور بہتر طرزِ زندگی کا ذریعہ ہے۔ ان کے مطابق جب انسان کے اندر سکون پیدا ہوتا ہے تو یہی احساس معاشرے اور دنیا میں امن کے فروغ کا سبب بنتا ہے۔
انہوں نے عوام پر زور دیا کہ یوگا کو صرف ایک دن کی تقریب تک محدود نہ رکھا جائے بلکہ اسے روزمرہ زندگی کا حصہ بنایا جائے۔ مودی نے کہا کہ آج یوگا دنیا کی سب سے بڑی اجتماعی سرگرمیوں میں شامل ہو چکا ہے اور مختلف مذاہب، ثقافتوں اور ممالک کے لوگوں کو ایک پلیٹ فارم پر لا رہا ہے۔
اس سال عالمی یومِ یوگا کا موضوع "صحت مند بڑھاپا” رکھا گیا ہے۔ مودی نے کہا کہ یوگا انسان کو عمر کے ہر مرحلے میں فعال، توانا اور بیماریوں سے محفوظ رکھنے میں مدد دیتا ہے۔
دوسری جانب اقوامِ متحدہ کے سیکریٹری جنرل انٹونیو گٹرس نے بھی عالمی یومِ یوگا کے موقع پر اپنے پیغام میں کہا کہ یوگا دنیا بھر میں لاکھوں افراد کو ذہنی سکون، جسمانی طاقت اور مثبت زندگی گزارنے میں مدد فراہم کر رہا ہے۔
