امت نیوز ڈیسک //
سری نگر، 18 جولائی: جموں و کشمیر کی وزیر تعلیم سکینہ ایتو نے کہا ہے کہ وادی کشمیر میں جاری شدید گرمی کی لہر کے پیش نظر اسکولوں کی موسمِ گرما کی تعطیلات میں توسیع کے بارے میں حکومت جلد فیصلہ کرے گی۔
سری نگر میں صحافیوں سے گفتگو کرتے ہوئے وزیر تعلیم نے کہا کہ حکومت صورتحال پر مسلسل نظر رکھے ہوئے ہے۔ انہوں نے بتایا کہ اس وقت اسکول اتوار تک بند ہیں اور بچوں کی صحت و سلامتی کو مدنظر رکھتے ہوئے تعطیلات میں توسیع کے بارے میں مناسب فیصلہ کیا جائے گا۔
سکینہ ایتو نے کہا کہ گزشتہ دو روز کے دوران وادی میں غیر معمولی گرمی ریکارڈ کی گئی ہے، جو گزشتہ برسوں میں دیکھنے میں نہیں آئی۔ ان کے مطابق تعلیم اپنی جگہ اہم ہے، لیکن طلبہ کی جان اور صحت حکومت کی اولین ترجیح ہے۔
انہوں نے مزید کہا کہ موجودہ موسمی حالات کا جائزہ لینے کے بعد ہی حتمی فیصلہ کیا جائے گا تاکہ طلبہ کو شدید گرمی میں مشکلات کا سامنا نہ کرنا پڑے۔
واضح رہے کہ کشمیر ڈویژن کے اسکولوں میں موسمِ گرما کی تعطیلات 6 جولائی سے 19 جولائی 2026 تک مقرر کی گئی تھیں۔
