فوربس کی ریئل ٹائم ارب پتیوں کی فہرست کے مطابق بھارتی تاجر گوتم اڈانی ، مائیکرو سافٹ کے شریک بانی بل گیٹس کو پیچھے چھوڑ کر دنیا کے چوتھے امیر ترین شخص بن گئے ہیں۔ جمعرات کو 60 سالہ بزنس ٹائیکون کی مجموعی دولت 115.5 بلین ڈالر تک پہنچ گئی جس کے بعد مسٹر گیٹس کی دولت 104.6 بلین ڈالر ہے۔ نوے بلین ڈالر کے ساتھ اڈانی کے ہم وطن اور ریلائنس گروپ کے مالک مکیش امبانی اس فہرست میں 10 ویں نمبر پر ہیں۔
اڈانی گروپ کے چیئرمین ایک چھوٹی اشیاء کی تجارت کے کاروبار کو بندرگاہوں، کانوں اور گرین انرجی پر پھیلے ہوئے ایک وسیع تجارتی گروپ میں تبدیل کرنے کے لیے مشہور ہیں۔ اڈانی گروپ کے کچھ لسٹڈ سٹاک پچھلے دو سالوں میں 600 فیصد سے زیادہ بڑھ گئے ہیں جو کہ گرین انرجی اور انفراسٹرکچر میں مزید سرمایہ کاری کیلئے مددگار ثابت ہونگے کیونکہ ادانی کے خیر خواہ وزیر اعظم نریندر مودی 2.9 ٹریلین ڈالر کی معیشت کا ہدف حاصل کرنے اور 2070 تک ہندوستان کے صفر کاربن نیٹ کے ہدف کو پورا کرنے کے خواہاں ہیں۔ یہ جانکاریاں بلومبرگ نے حال ہی فراہم کی تھیں جب اڈانی نے مسٹر امبانی کو ایشیا کے سب سے امیر شخص کے طور پر پیچھے چھوڑ دیا۔
بمشکل تین سالوں میں، اڈانی نے سات ہوائی اڈوں اور ہندوستان کے تقریبا ایک چوتھائی ہوائی ٹریفک کا کنٹرول حاصل کر لیا ہے۔ ان کا گروپ اب غیر ریاستی شعبے میں ملک کے سب سے بڑے ہوائی اڈے آپریٹر، پاور جنریٹر اور سٹی گیس ریٹیلر کا مالک ہے۔ مسٹر اڈانی نے جمعرات کو کہا کہ گروپ نے گیڈوٹ کے ساتھ شراکت میں اسرائیل میں ایک بندرگاہ کی نجکاری کا ٹینڈر جیت لیا ہے۔
بندرگاہ حیفہ اسرائیل کی تین بڑی بین الاقوامی بندرگاہوں میں سب سے بڑی بندرگاہ ہے۔نیلامی میں اڈانی ڈیٹا نیٹ ورکس کے ساتھ ریلائنس جیو، بھارتی ایئر ٹیل، وودا فون اور آئیڈیا نے بھی حصہ لینے کی درخواست دی ہے۔ 26 جولائی کو شروع ہونے والی سپیکٹرم نیلامی میں کچھ فریکوئنسی بینڈز کے لیے جارحانہ بولیاں لگ سکتی ہیں۔ اڈانی گروپ نے ہفتے کے روز کہا کہ وہ سپیکٹرم حاصل کرنے کی دوڑ میں ہے، جس کے بارے میں کہا گیا ہے کہ اس کا استعمال ہوائی اڈوں سے لے کر پاور کے ساتھ ساتھ ڈیٹا سینٹرز تک اپنے کاروبار کی مدد کے لیے ایک نجی نیٹ ورک بنانے کے لیے کیا جائے گا۔
