سری نگر//بندوق کھار محلہ ہزاری بازار رعناواری سری نگر میں گزشتہ رات بھیانک آتشزدگی میں چار خاندانوں کا مشترکہ 3 منزلہ مکان جل کر خاکستر ہو گیا۔
مقامی لوگوں نے بتایا کہ گھر میں آگ لگنے کے فوراً بعد لوگوں نے فائر اینڈ ایمرجنسی ڈیپارٹمنٹ کو فون کیا۔ فائر ٹینڈرز نے فوری طور پر موقع پر پہنچ کر آگ کو مزید پھیلنے سے روک دیا۔ تاہم، ان کا کہنا تھا کہ جب تک آگ پر قابو پا لیا گیا، مکان مکمل طور پر جل کر خاکستر ہو چکا تھا۔
تفصیلات کے مطابق فیاض احمد شاہ، نذیر احمد شاہ، غلام رسول شاہ اور نور محمد شاہ کے چار خاندان گھر میں رہائش پذیر تھے اور وہ ہولناک آتشزدگی میں “سب کچھ” کھو گئے ہیں۔
غلام رسول شاہ نے بتایا، “آگ گزشتہ رات ساڑھے بارہ بجے کے قریب لگی اور ہم نے اپنا سب کچھ اس آگ میں کھو دیا، گھر میں چار خاندان آباد تھے، ہمارے پاس اب رہائش کیلئے کوئی ٹھکانا نہیں ہے “۔
مقامی لوگوں نے بتایا کہ آگ پہلی منزل سے بھڑکی اور جلد ہی اس نے پوری عمارت کو اپنی لپیٹ میں لے لیا۔
فائر اینڈ ایمرجنسی ڈپارٹمنٹ کے ایک اہلکار نے بتایا کہ محکمہ کی بروقت کارروائی سے آگ کو مزید پھیلنے سے روک لیا گیا۔ انہوں نے کہا کہ اس واقعہ میں کوئی جانی نقصان نہیں ہوا۔
ایک پولیس اہلکار نے بتایا کہ آگ لگنے کی وجہ کی جانچ کی جا رہی ہے.
