امت نیوز ڈیسک //
مرکزی وزیر داخلہ امت شاہ تین اکتوبر کو جموں کشمیر کے تین روزہ دورے پر آرہے ہیں، اس دوران وہ راجوری اور بارہ مولہ میں پہاڑی طبقے کی آبادی سے خطاب کریں گے۔ امت شاہ تین اکتوبر کو دلی سے جموں پہونچیں گے جہاں وہ مختلف سیاسی و سماجی وفود سے ملاقاتیں کریں گے۔ ان وفود میں گجر بکروال طبقے کے رہنماؤں، یوا راجپوت سبھا بھی شامل ہیں جو وزیر داخلہ کو گجر لیڈر غلام علی کھٹانہ کے راجیہ سبھا ممبر بنانے پر امت شاہ کا شکریہ ادا کریں گے جبکہ مہاراجہ ہری سنگھ کے یوم پیدائش کو سرکاری تعطیل منانے پر یوا راجپوت سبھا بھی وزیر داخلہ کو شکریہ پیش کریں گے۔
چار اکتوبر یعنی منگل کو امت شاہ صبح کٹرہ میں ماتا وشنو دیوی کے مندر میں پوجا کریں گے اور وہیں سے وہ راجوری قصبہ پہنچ کر پہاڑی طبقہ کی ریلی سے خطاب کریں گے۔وزیر داخلہ سرینگر روانہ ہوں گے جہاں وہ ایل جی اور سیکورٹی فورسز کے اعلی افسران کے ساتھ حالات کا جائزہ لیں گے۔
پانچ اکتوبر یعنی بدھ کو امت شاہ بارہمولہ میں پہاڑی طبقے کی ریلی سے خطاب کریں گے،بتایا جاتا ہے کہ ان دونوں ریلیوں میں امت شاہ پہاڑی طبقے کے لئے ریزرویشن کا اعلان کریں گے جس کی گجر آبادی شدید مخالفت کر رہی ہے،اس دورے کے دوران امت شاہ تعمیراتی کاموں کا بھی جائزہ لیں گے جبکہ کچھ پروجکٹز کی افتتاح اور سنگ بنیاد بھی رکھیں گے۔ واضح رہے کہ امت شاہ یکم اور دو اکتوبر کو یہ دورہ کرنے والے تھے لیکن یہ 3-5 اکتوبر موخر کر دیا گیا۔
