امت نیوز ڈیسک //
سرینگر:محکمہ موسمیات نے وادی کشمیر میں جمعرات شام تک میدانی علاقوں میں بارشوں جب کہ پہاڑی علاقوں میں برفباری کی پیش گوئی کی تھی جس کے عین مطابق وادی کشمیر کے مختلف علاقوں میں بارشوں اور برف باری کا سلسلہ شروع ہوا۔ بارشوں اور برف باری کا سلسلہ دوبارہ شروع ہونے سے سردی کی شدت میں مزید اضافہ ہوگیا۔ بارشوں اور برفباری کے سبب سردی میں قدرے اضافہ درج ہوا ہے۔ وہیں شہرہ آفاق سیاحتی مقام گلمبرگ میں گزشتہ شب کا کم سے کم درجہ حرارت منفی دو ڈگری سیلشیس ریکارڈ کیا گیا۔
کشمیر کے بالائی علاقوں میں برفباریضلع گاندربل کے معروف سیاحتی مقام سونہ مرگ زوجیلا درے پر قریب چھ انچ برفباری درج کی گئی ہے جبکہ جنوبی کشمیر کے ضلع شوپیاں میں ہیرپورہ اور اس کے ملحقہ پہاڑی علاقوں میں دو سے چار انچ برفباری ریکارڈ جمع ہوئی ہے۔ وہیں ضلع شوپیان کے پہاڑی علاقوں جن میں ہیرپورہ، پیر کی گلی، سکھ سراے، لال گلام اور مغل سراے شامل ہیں میں بھی تازہ برفباری جاری ہے جبکہ میدانی علاقوں میں بارشوں کا سلسلہ جاری ہے۔
برفباری کے پیش نظر سرینگر – لداخ شاہراہ کو فی الحال احتیاطی طور پر بند کر دیا گیا ہے وہیں جنوبی کشمیر کو صوبہ جموں کے پونچھ اور راجوری اضلاع سے جوڑنے والی مغل شاہراہ کو بھی برفباری کے پیش نظر ٹریفک کی آمد و رفت کے لیے بند کر دیا گیا ہے۔ وادی کشمیر میں موسم میں آئی تبدیلی کے باعث سردی میں قدرے اضافہ ہوا ہے لوگوں نے سردی کا مقابلہ کرنے کے لئے گرم ملبوسات زیب تن کئے ہوئے ہیں اور گرمی کے آلات با لخصوص روایتی کانگڑی کا بھی استعمال شروع کیا گیا ہے۔
