تہران: ایران کے معروف و متنازعہ عالم دین اور ملک کے سپریم لیڈر آیت اللہ علی خامنہ ای کے بہنوئی علی تہرانی 96 سال کی عمر میں انتقال کر گئے ہیں۔
علی تہرانی ایران کے آمرانہ حکمران شاہ محمد رضا پہلوی اور 1979 میں شاہ کا تختہ الٹنے والے اسلامی رہنماؤں پر تنقید کرتے رہے ہیں۔ علی تہرانی نے اسلامی انقلاب کے بعد زیادہ آزادانہ سیاسی نظام کی وکالت کی۔
انہوں نے حکومت میں علما کے کردار کی مخالفت کی اور مارکسی اور سیکولر دھڑوں سمیت تمام سیاسی گروہوں کی آزادی کی حمایت کی۔
علی تہرانی کا انتقال بدھ کو ہوا اور ان کی موت کی اطلاع نیم سرکاری خبر رساں ایجنسی تسنیم نے جمعرات کو دی۔ ایران کے سرکاری میڈیا نے ان کی موت کا ذکر نہیں کیا۔ تہرانی نے 1950 کی دہائی میں موجودہ سپریم لیڈر آیت اللہ علی خامنہ ای کی بہن بدری سے شادی کی تھی۔
سنہ1979میں علی تہرانی نے اسلامی جمہوریہ کے بانی، آیت اللہ روح اللہ خمینی کی طرف سے اپنے بہنوئی کو نماز جمعہ کے اہم کردار کے لیے مقرر کرنے کے فیصلے پر احتجاج کیا۔
علی تہرانی نے ملک کے پہلے صدر ابوالحسن بنیصدر کی حمایت کی، جو 1981 میں سخت گیر لوگوں سے لڑنے کے بعد جلاوطن ہو گئے تھے۔ علی تہرانی کو 1981 میں کئی ماہ تک جیل میں رکھا گیا، پھر انہیں گھر میں نظر بند کر دیا گیا، وہ سنہ 1984 میں ہمسایہ ملک عراق فرار ہو گئے۔
اس وقت دونوں ملک حالت جنگ میں تھے۔ انہوں نے عراق میں ریڈیو نشریات کے ذریعے ایران کی حکومت کے خلاف اپنی مہم جاری رکھی۔ تہرانی 1995 میں ایران واپس آئے اور انہیں 20 سال قید کی سزا سنائی گئی۔ 2005 میں رہائی کے بعد زیادہ تر خاموش رہے۔
