امت نیوز ڈیسک //
بیجنگ: چین کے دو روزہ دورے پر آئے ہوئے پاکستان کے وزیراعظم شہباز شریف نے چینی صدر شی جن پنگ سے ملاقات کی اور دونوں ممالک کے درمیان باہمی تعاون بالخصوص اقتصادی شعبوں میں تبادلہ خیال کیا۔دونوں رہنماؤں نے ملاقات میں سی پیک سمیت کثیر جہتی تعاون بڑھانے اور اسٹریٹجک پارٹنرشپ مزید مضبوط کرنے پر اتفاق کیا۔ بدھ کو ایک فیس بک پوسٹ میں، شہباز شریف نے بتایا کہ چین اور پاکستان، بشمول سی پیک CPEC، کثیر الجہتی تعاون کو بڑھانے اور اسٹریٹجک شراکت داری کو مزید مضبوط بنانے کے لیے ایک باہمی معاہدے پر پہنچے ہیں۔
ملاقات کے دوران چینی صدر کی جانب سے یقین دہانی کرائی گئی کہ معاشی استحکام کی جدوجہد میں چین پاکستان کے ساتھ اپنا تعاون جاری رکھے گا۔ اسے علاوہ وزیر اعظم شہباز شریف نے صدر شی جن پنگ سے علاقائی اور عالمی پیش رفت پر بھی تبادلہ خیال بھی کیا۔ پاکستانی رہنما نے ملاقات کی تصاویر بھی پوسٹ کیں۔ شہباز شریف دو روزہ سرکاری دورے پر منگل کی رات بیجنگ پہنچے۔ شہباز شریف کا وزارت عظمیٰ کا منصب سنبھالنے کے بعد چین کا یہ پہلا دورہ ہے۔
چین روانگی سے قبل انہوں نے سلسلہ وار ٹویٹس میں کہا کہ آج بیجنگ روانہ ہوں گے۔ سی پی سی کی تاریخی 20 ویں قومی کانگریس کے بعد مدعو کیے جانے والے پہلے چند رہنماؤں میں شامل ہونے کا اعزاز ایک ایسے وقت میں حاصل ہوا جب دنیا بہت سے چیلنجز سے نبرد آزما ہے، پاکستان اور چین دوست اور شراکت دار کے طور پر ایک ساتھ کھڑے ہیں۔
چینی قیادت کے ساتھ میری بات چیت بہت سی دوسری چیزوں کے ساتھ سی پیک کے احیاء پر مرکوز ہوگی۔ CPEC کا دوسرا مرحلہ سماجی و اقتصادی ترقی کے ایک نئے دور کے آغاز کا وعدہ کرتا ہے، جس سے ہمارے لوگوں کا معیار زندگی بہتر ہو گا۔ چین کے معاشی معجزے سے بہت کچھ سیکھنے کو ملتا ہے۔ وزیراعظم وزیراعظم لی کی چیانگ کے ساتھ وفود کی سطح پر بات چیت اور چینی سرمایہ کاروں اور پاکستانی تاجروں سے بھی ملاقاتیں کرنے والے ہیں۔
