امت نیوز ڈیسک //
جموں و کشمیر میں نوجوانوں کی کھیلوں کی صلاحیتوں کو استفادہ دینے کے لیے انتظامیہ تمام 20 اضلاع میں کھیلوں کے56 اسٹیڈیم اور مراکز تعمیر کرنے جارہی ہے۔
سرکاری ذرائع کے مطابق 3 اضلاع کو چھوڑ کر باقی تمام اضلاع میں3 اسپورٹس اسٹیڈیم اورکھیل مراکز بنائے جائیں گے جن میں یوٹی سطح کے کھیل مقابلے بھی منعقد کئے جا سکیں گے۔
جاری کردہ ایک نوٹیفکیشن کے مطابق ضلع سرینگر میں فٹ بال، ہاکی اور جمناسٹک کےلئے اسٹیڈیم تعمیر کئے جائیں گے۔
بڈگام میں سائیکلنگ، ووشو اور کبڈی، گاندربل میں بیڈمنٹن، والی بال اور تھانگ تا، بانڈی پورہ میں ہاکی، فٹ بال اور باکسنگ، بارہمولہ میں بیڈمنٹن، ٹیبل ٹینس اور ہاکی، اننت ناگ میں ، والی بال اور کھوکھو، کولگام میں کبڈی اور والی بال،پلوامہ میں ریسلنگ، ہاکی، ٹیبل ٹینس اور اسکیٹنگ، شوپیاں میں والی بال اور تائیکوانڈو اور کپواڑہ میں فٹ بال، کھوکھو اور کبڈی کےلئے اسٹیڈیم تعمیر کئے جائیں گے۔
اسی طرح جموں ضلع میں سافٹ ٹینس، ٹیبل ٹینس اور ہاکی،ضلع سانبہ میں والی بال، ریسلنگ اور باکسنگ،ضلع کٹھوعہ میں فٹ بال اور روئنگ، ادھم پور ضلع میں ٹیبل ٹینس، ہینڈ بال اور باسکٹ بال، ضلع ریاسی میں جمناسٹک، ڈوڈہ ضلع میں یوگا، تیر اندازی اورٹیبل ٹینس ، ضلع کشتواڑ میں اتھلیٹس، والی بال اور ٹھگ ٹا،ضلع رام بن میں فٹ بال اور کبڈی، ضلع راجوری میں ٹیبل ٹینس اور ریسلنگ اورضلع پونچھ میں فٹ بال، بیڈمنٹن اور والی بال کےلئے اسٹیڈیم تعمیر کئے جائیں گے جبکہ چارلان فضل آباد میں فٹ بال گراونڈ بنایا جا رہا ہے۔
انتظامیہ نے 20 اضلاع میں کھیلوں کے56 اسٹیڈیم اور مراکز کےلئے کوچ، چمپئن ایتھلیٹس کے طور پر تعینات ہونے کےلئے اہل کھلاڑیوں سے درخواستیں طلب کی ہیں۔جموں و کشمیر اسپورٹس کونسل کی جاری کردہ نوٹیفکیشن کے مطابق پہلی ترجیح اُن کھلاڑیوں کو دی جائے گی جنہوں نے ہندوستان کی نمائندگی کی ہے اور انہیں متعلقہ کھیلوں میں نیشنل اسپورٹس فیڈریشن آف انڈیاکے ذریعہ تسلیم کیا گیا ہے، دوسری ترجیح ایسے کھلاڑیوں کو دی جائے گی جنہوں نے سینئر نیشنل چمپئن شپ میں تمغے جیتے ہیں یا میڈل جیتے ہیں۔تیسری ترجیح آل انڈیا یونیورسٹی چمپئن شپ میں میڈل جیتنے والوں کو دی جائے گی اور چوتھی ترجیح سینئر نیشنل چمپئن شپ میں ریاست کی نمائندگی کرنے والے کھلاڑیوں کو دی جائے گی جو این ایس ایف کے ذریعہ تسلیم شدہ ہیں اور جنہوں نے کھیلو انڈیا گیمز میں حصہ لیا ہے۔
