امت نیوز ڈیسک //
نئی دہلی: بھارت نے گزشتہ روز دو ٹوک الفاظ میں برطانیہ اور امریکہ سے کہا کہ وہ اپنے ممالک میں بھارتی مشن کی حفاظت کے لئے ٹھوس اقدامات کریں اور حملہ آوروں کے خلاف کارروائی کو یقینی بنائیں۔ یہاں ایک معمول کی بریفنگ میں بھارتی مشن پر خالصتانی انتہا پسند عناصر کے پرتشدد حملوں سے متعلق ایک سوال کے جواب میں وزارت خارجہ کے ترجمان ارندم باغچی نے کہا، "کم از کم لندن اور سان فرانسسکو میں، ہم نے توڑ پھوڑ کے معاملے کو بہت سختی سے اٹھایا ہے۔ آپ نے اس حوالے سے ہمارے بیانات بھی دیکھے ہوں گے۔ ہم میزبان حکومتوں سے توقع کرتے ہیں کہ وہ تمام ملوث افراد کی نشاندہی کر کے ان کے خلاف ضروری کارروائی کریں۔’
ترجمان ارندم باغچی نے کہا کہ "ہم میزبان حکومتوں سے توقع کرتے ہیں کہ وہ ہمارے مشن اور وہاں کام کرنے والے اہلکاروں کو مکمل اور مناسب سکیورٹی فراہم کی جائے گی۔ ہمیں صرف یقین دہانیوں میں دلچسپی نہیں ہے، ہم کارروائی دیکھنا چاہیں گے۔‘‘ امرت پال سنگھ کے بارے میں مختلف افواہوں پر ایک سوال کے جواب میں، پنجاب میں خالصتانی تحریک کو بھڑکانے کے الزام پر ارندم باغچی نے کہا، "پنجاب میں حکام ایک مفرور کو پکڑنے کے لیے آپریشن چلا رہے ہیں۔ اس آپریشن کے بارے میں متعلقہ حکام پنجاب میں مستقل بنیاد پر معلومات شیئر کر رہے ہیں۔ ہم بیرون ملک لوگوں سے گزارش کریں گے کہ وہ جھوٹے اور اشتعال انگیز بیانات کا شکار نہ ہوں۔ واضح رہے کہ 19 مارچ کو لندن میں بھارتی ہائی کمیشن میں توڑ پھوڑ کے ساتھ ساتھ قومی پرچم کی توہین کی گئی تھی۔ اگلے دن سان فرانسسکو میں قونصل خانے میں توڑ پھوڑ کی گئی۔یو این آئی
