امت نیوز ڈیسک //
سری نگر، یکم اگست : کرائم برانچ کشمیر (سی بی کے) کی اقتصادی جرائم ونگ نے مبینہ طور متعدد جرائم میں ملوث ہونے کے الزام میں دو افراد کے خلاف چارج شیٹ دائر کی ہے۔سی بی کے کے ایک ترجمان نے اپنے ایک بیان میں کہا کہ اقتصادی جرائم ونگ سری نگر (کرائم برانچ کشمیر) نے آر پی سی کے دفعات 419، 468، 471، 120B اور 201 کے تحت قابل سزا جرائم میں مبینہ طور پر ملوث ایف آئی آر زیر نمبر 60/2016 میں دو افراد کے خلاف چارج شیٹ دائر کی ہے۔
انہوں نے کہا: ‘کرائم برانچ کشمیر (اب اقتصادی جرائم ونگ سری نگر) کو تحصیلدار(سائوتھ) سری نگر سے ایک مواصلت موصول ہوئی جس میں انکشاف کیا گیا تھا کہ ان ملزموں نے بے ایمانی اور دھوکہ دہی سے بینک قرضہ حاصل کرنے کے لئے جعلی محصولات تیار کرکے ان کو جموں و کشمیر بینک کے ہری سنگھ ہائی اسٹریٹ برانچ میں جمع کیا’۔
بیان میں کہا گیا کہ بینک حکام نے ان جعلی محصولات کو شکایت کنندہ (تحصیلدار سائوتھ) کو تصدیق کے لئے بھیج دیا تھا جو ویری فکیشن کے بعد جعلی پائے گئے۔
انہوں نے کہا کہ اس کے بعد پولیس اسٹیشن کرائم برانچ کشمیر میں سال 2016 میں ایک کیس درج کرکے تحقیقات شروع کی گئیں۔
بیان کے مطابق تحقیقات کے دوران عائد شدہ الزامات کو سچ ثابت کیا گیا اس طرح ملزمان کے خلاف عدالتی فیصلے کے لئے چارج شیٹ دائر کی گئی۔(یو این آئی)
