امت نیوز ڈیسک //
سری نگر، 30 اکتوبر: جنوبی کشمیر کے پلوامہ ضلع کے نیوا علاقے میں پیر کی دوپہر نامعلوم عسکریت پسندوں نے ایک غیر مقامی مزدور کو گولی مار کر ہلاک کر دیا۔
ایک اہلکار نے نیوز ایجنسی کشمیر اسکرول کو بتایا کہ یوپی سے تعلق رکھنے والے مکیش کمار کے نام سے شناخت شدہ شخص کو نوپورہ پری گام پلوامہ میں عسکریت پسندوں نے گولی مار دی۔
انہوں نے بتایا کہ مزدور کو علاج کے لیے اسپتال لے جایا گیا جہاں ڈاکٹروں نے اسے مردہ قرار دے دیا۔
اس دوران حملہ آوروں کو پکڑنے کے لیے علاقے کو گھیرے میں لے لیا گیا ہے۔
پولیس نے ایک ٹویٹ میں کہا کہ پلوامہ کے تمچی نوپورہ علاقے میں یو پی کے مکیش کے طور پر شناخت کیے گئے ایک مزدور پر گولی چلائی، جو بعد میں زخموں کی تاب نہ لاتے ہوئے چل بسا۔ علاقے کو گھیرے میں لے لیا گیا۔ مزید تفصیلات سامنے آئیں گی۔
