امت نیوز ڈیسک //
سرینگر// صوبائی کمشنر کشمیر وجے کمار بھدوری نے منگل کو لوگوں پر زور دیا کہ وہ گاڑیوں اور بوتلوں کے ساتھ پٹرول پمپوں پر پہنچ کرخوف وہر اس پیدا نہ کریں۔ انہوں نے کہا کہ وادی میں تقریباً ایک ماہ کیلئے پٹرول، مٹی کے تیل اور ایل پی جی کا کافی ذخیرہ موجود ہے۔ ڈویژنل کمشنر وجے کمار بدھوری نے کہا کہ پٹرول پمپوں پر گاڑیوں اور پٹرول کی بوتلوں کے ساتھ جمع ہونے والے لوگ خوف وہر اس کا باعث بنیں گے کیونکہ پٹرول، مٹی کے تیل اور ایل پی جی کی کوئی کمی نہیں ہے۔ بھدوری نے کہا، ”ہمارے پاس کشمیر میں پٹرول اور ایل پی جی سمیت تقریباً ایک ماہ کے لیے ضروری اشیاء کا کافی ذخیرہ ہے”۔
انہوں نے کہا کہ لوگ گھبرائیں نہیں بلکہ پر سکون رہیں۔انہوں نے کہا، ” ٹرانسپورٹروں کی ہڑتال کا کشمیر پر کوئی اثر نہیں پڑے گا۔ ٹرانسپورٹرز کے ساتھ مذاکرات جاری ہیں”۔
کشمیر کی انتظامیہ اس بات کو یقینی بنانے کے لیے پر عزم ہے کہ لوگوں کو سردیوں کے دوران پیٹرول اور ایل پی جی سمیت دیگر اشیائےضروریہ کی کمی کا سامنا نہ کرنا پڑے۔
