امت نیوز ڈیسک //
جموں سمارٹ سٹی کیلئے ای-بس خدمات شروع کرنے اور مشترکہ مسابقتی امتحانات کے ذریعے منتخب ہونے والے جموں و کشمیر کے 209 امیدواروں کو تقرری خط دینے اور 885 ہمدردانہ تقرری خطوط جاری کرنے پر مرکزی وزیر داخلہ امیت شاہ کا شکریہ ادا کرتے ہوئے لیفٹنٹ گورنر منوج سنہا نے کہا کہ جموں و کشمیر کی مجموعی ترقی کو سب سے زیادہ ترجیح دی جا رہی ہے۔انہوں نے کہا کہ آج جموں کشمیر کے لوگوں کیلئے وقف کردہ 100 ای بسیں جموں شہر اور منسلک علاقوں میں سمارٹ موبلیٹی کو تبدیل کریں گی اور شہریوں کے معیار زندگی کو بہتر بنائیں گی۔
لیفٹنٹ گورنر نے کہا کہ آج، 885 ہمدردانہ تقرری کے خطوط جاری کیے گئے، جو شہداءاور محنتی ملازمین کے خاندانوں کو باوقار زندگی گزارنے کو یقینی بنانے کے ہمارے عزم کا منہ بولتا ثبوت ہے۔
انہوں نے جموں کشمیر کے لوگوں کو یقین دلایا کہ وہ بقیہ مقدمات کی ہمدردانہ تقرریوں کے عمل کو تیز کریں گے۔ انہوں نے کہا ”ہر آنکھ سے آنسو پونچھنا اور ہر خاندان کے لیے خوشگوار اور کامیاب زندگی کو یقینی بنانا ہمارا عزم ہے۔“اس موقع پر لیفٹنٹ گورنر نے سماج کے ہر طبقے بالخصوص جموں کشمیر کے نوجوانوں کو سماجی و اقتصادی طور پر بااختیار بنانے کیلئے یوٹی انتظامیہ کی کوششوں پر روشنی ڈالی۔انہوں نے کہا کہ 24 جنوری کو ایک ہی دن میں 94,680 نوجوانوں کو فراہم کردہ انٹرپرینیورشپ اور خود روزگار کے مواقع نے جموں و کشمیر کی تاریخ میں ایک سنہری باب رقم کیا ہے۔میرٹ پر مبنی اور شفاف بھرتیوں نے جموں و کشمیر کے باصلاحیت نوجوانوں کو اپنی تقدیر خود بنانے کے قابل بنایا ہے۔ لیفٹیننٹ گورنر نے مزید کہا کہ اگست 2019 کے بعد 31,830 تقرریاں کی گئیں اور 12,264 آسامیوں کے لیے بھرتیوں کا عمل جاری ہے۔
لیفٹیننٹ گورنر نے کہا کہ وزیر اعظم نریندر مودی اور وزیر داخلہ امیت شاہ کی رہنمائی میں ہم جموں و کشمیر کے لوگوں کی صلاحیتوں اور خوابوں کو پورا کرنے کے لیے بھرپور کوششیں کر رہے ہیں۔
