امت نیوز ڈیسک //
کپوارہ: جموں وکشمیر پولیس، فوج نے شمالی کشمیر کے کپوارہ ضلع میں ناکہ چیکنگ کے دوران عسکریت پسندوں کے ایک معاون کو گرفتار کرکے اس کی تحویل سے اسلحہ و گولہ باردو بر آمد کرنے کا دعویٰ کیا ہے۔ پولیس ترجمان نے اپنے ایک بیان میں کہا ہے کہ عسکری معاون کو کپوارہ پولیس، فوج کی 28 آر آر اور سی آر پی ایف کی 162 بٹالین کی ایک ٹیم نے ضلع کے گنڈ ماچر پُل پر قائم کیے گئے مشترکہ ناکہ چیکنگ کے دوران گرفتار کیا گیا۔
پولیس ترجمان نے بتایا کہ حفاظتی اہلکاروں نے سفید رنگ کا بیگ لئے ایک شخص کو مشکوک حالت میں نقل و حرکت کرتے ہوئے دیکھا جو لال پورہ سے گنڈ ماچر کی طرف آ رہا تھا۔ پولیس بیان کے مطابق ’’مستعد سیکورٹی فورسز کو دیکھ کر اس سے فرار ہونے کی کوشش کی تاہم فورسز نے کارروائی انجام دیتے ہوئے اسے دھر دبوچ لیا۔‘‘ انہوں نے مزید کہا کہ ابتدائی پوچھ تاچھ کے دوران اس شخص نے اپنی شناخت رفیق احمد گنائی ولد غلام احمد گنائی ساکنہ لال پورہ، شیخ پورہ کے طور پر ظاہر کی ہے۔
کپوارہ پولیس ترجمان نے مزید بتایا کہ تلاشی کے دوران بیگ سے ایک پستول، ایک پستول میگزین، 10 گولیاں، 2 ہینڈ گرینیڈ اور ایک موبائل فون بر آمد کیا گیا۔ اس ضمن ایک مقدمہ زیر ایف آئی آر نمبر 03/2024 U/S 7/25 A ایکٹ، 13,18, 23, 39 ULA (P) پولیس تھانہ لالپورہ میں درج کرکے مزید تحقیقات شروع کر دی گئی ہے۔
