امت نیوز ڈیسک //
19 فروری، سری نگر: غلام نبی آزاد کی طرف سے ڈاکٹر فاروق عبداللہ اور عمر عبداللہ کی رات کے اوقات میں وزیر اعظم نریندر مودی اور وزیر داخلہ امیت شاہ سے ملاقاتیں کرنے کے الزام کے چند گھنٹے بعد، سینئر عبداللہ نے موجودہ ڈیموکریٹک پروگریسو آزاد پارٹی (ڈی پی اے پی) پر جوابی حملہ کرتے ہوئے سوال کیا ہے؟ کیا وجہ ہے کہ اس نے (آزاد) اسے بدنام کرنے کا سوچا ہے؟۔
ایک نیوز ایجنسی سے بات کرتے ہوئے ڈاکٹر فاروق عبداللہ نے کہا کہ ’’اگر مجھے پی ایم مودی یا مرکزی وزیر داخلہ امیت شاہ سے ملنا ہے تو میں ان سے دن میں ملوں گا، رات کو کیوں ملوں؟… کیا وجہ ہے کہ اس نے فاروق عبداللہ کو بدنام کرنے کا سوچا ہے؟ ’’جب کوئی انہیں راجیہ سبھا کی سیٹ نہیں دینا چاہتا تھا تو میں نے ہی انہیں راجیہ سبھا کی سیٹ دی تھی… لیکن آج وہ یہ سب کہہ رہے ہیں۔‘‘
انہوں نے کہا کہ” اسے اپنے ایجنٹوں کے نام بتانے چاہئیں جو وزیر اعظم اور مرکزی وزیر داخلہ کی رہائش گاہ پر بیٹھے ہیں۔ اسے لوگوں کو بتانا چاہئے تاکہ وہ حقیقت کو سمجھ سکیں…“
قابل ذکر بات یہ ہے کہ تجربہ کار سیاستدان نے آرٹیکل 370 کی تنسیخ پر حکومت ہند کے فیصلے کی ممکنہ پیشگی جانکاری کے بارے میں آزاد کی طرف سے لگائے گئے الزامات کا کوئی ذکر نہیں کیا۔
واضح رہے کہ جموں و کشمیر کے سابق وزیر اعلیٰ غلام نبی آزاد نے دعویٰ کیا تھا کہ دہلی میں یہ افواہیں پھیلی ہیں کہ عبداللہ فیملی کو آرٹیکل 370 کی منسوخی کے فیصلے کے بارے میں اعتماد میں لیا گیا ہے، اور انہوں نے وادی کے رہنماؤں کو نظر بند کرنے کا مشورہ بھی دیا تھا۔
آزاد نے یہ بھی دعویٰ کیا کہ عبداللہ نے رات کو وزیر اعظم نریندر مودی اور وزیر داخلہ امیت شاہ کے ساتھ خفیہ ملاقاتیں کیں تاکہ عوامی جانچ سے بچ سکیں۔
