امت نیوز ڈیسک //
ہلوامہ: جموں و کشمیر پولیس نے شمالی کشمیر کے ضلع بارہمولہ میں دہائیوں سے گرفتاری سے بچنے والے 4 مفرور افراد کو گرفتار کیا ہے۔ گرفتار شدگان کے خلاف پولیس اسٹیشن پٹن، پولیس اسٹیشن چندوسہ، پولیس اسٹیشن شیری اور پولیس اسٹیشن کنزر میں مقدمے درج ہیں۔ ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ جموں وکشمیر پولیس کی ایک خصوصی ٹیم نے گذشتہ دہائیوں سے گرفتاری سے بچنے والے 4 مفرور افراد کو گرفتار کیا ہے جو پولیس اسٹیشن پٹن، پولیس اسٹیشن چندوسہ، پولیس اسٹیشن شیری اور پولیس اسٹیشن کنزر میں درج مقدموں میں ملوث تھے۔
انہوں نے گرفتار شدگان کی شناخت منظور احمد شاہ ولد عبدالمجید شاہ ساکن عید گاہ سری نگر، محمد رفیق کھتان ولد سیف الدین ساکن رنگا والی ٹنگمرگ، محمد یوسف شیخ ولد غلام رسول ساکن بجتھالن بونیار اور بابر بشیر پالا ولد بشیر احمد ساکن کرنکشیون سوپور کے طور پر کی ہے۔ بیان میں کہا گیا کہ سی آر پی سی کے سیکشن 512 کے تحت فرسٹ ایڈیشنل سیشنز جج بارہمولہ کی عدالت، جے ایم آئی سی ٹنگمرگ اور سب جج جی ایم آئی اسی بارہمولہ نے ملزموں کے خلاف وارنٹ جاری کی تھی۔ انہوں نے کہا کہ بعد میں گرفتار ملزموں کو عدالت کے سامنے پیش کیا گیا۔
پلوامہ میں دو مفرور ملزمین گرفتار
وہیں پلوامہ میں پولیس نے دو مفرور ملزمان کو گرفتار کیا جو گذشتہ دو دہائیوں سے اپنی گرفتاری سے بچ رہے تھے۔ پلوامہ پولیس کی ایک خصوصی پولیس ٹیم جو مفروروں کو پکڑنے کے لیے تشکیل دی گئی تھی، نے دو ایسے مفرور افراد کو گرفتار کیا جو گذشتہ دو دہائیوں سے پولیس کی گرفت سے بچنے کی کوشش کر رہے تھے۔
ان دونوں کے خلاف پولیس اسٹیشن راجپورہ میں مقدمات درج تھے۔ ان میں ایک ملزم کی شناخت منظور احمد وانی ولد غلام محمد وانی ساکن باغ سنگروانی کے طور پر ہوئی ہے۔ اس کے خلاف مقدمہ ایف آئی آر نمبر 08/1999 زیر دفعہ 376، 366 آر پی سی درج ہے۔ وہیں دوسرے ملزم کی شناخت جاوید احمد ٹیڈوا ولد محمد یاسین ٹیڈوا ساکن سنگروانی کے طور پر ہوئی ہے جس کے خلاف سیکشن 379 آر پی سی 6 ایف ایکٹ کے تحت ایف آئی آر نمبر 89/2008 پولیس اسٹیشن راجپورہ میں درج ہے۔ گرفتاری کے بعد دونوں ملزمان کو عدالت میں پیش کیا گیا۔
