امت نیوز ڈیسک //
سری نگر: جموں و کشمیر کے سابق وزیر اعلیٰ غلام نبی آزاد اننت ناگ-راجوری حلقہ سے لوک سبھا الیکشن لڑیں گے، ان کی پارٹی ڈی پی اے پی نے اسکا آج اعلان کیا۔
آزاد نے 2022 میں کانگریس چھوڑ دی، پارٹی کے ساتھ اپنی پانچ دہائیوں کی رفاقت کو ختم کیا، اور اپنی سیاسی تنظیم ڈیموکریٹک پروگریسو آزاد پارٹی (DPAP) کی بنیاد رکھی۔
ڈی پی اے پی کے لیڈر تاج محی الدین نے یہاں نامہ نگاروں کو بتایا، ’’آج ڈی پی اے پی کی کور کمیٹی کی میٹنگ ہوئی اور ہم نے فیصلہ کیا ہے کہ (پارٹی صدر) غلام نبی آزاد اننت ناگ-راجوری سیٹ سے الیکشن لڑیں گے۔‘‘
2014 میں ادھم پور حلقہ سے بی جے پی لیڈر جتیندر سنگھ سے ہارنے کے بعد آزاد کے لیے یہ پہلا لوک سبھا الیکشن ہوگا۔ الطاف بخاری کی اپنی پارٹی کے ساتھ اتحاد کے امکان پر محی الدین نے کہا کہ اس محاذ پر کوئی پیش رفت نہیں ہوئی۔ "ہمارے پاس وقت کی کمی ہے اور بات چیت میں زیادہ پیش رفت نہیں ہوئی۔ اس لیے بہتر ہے کہ وہ اپنا کام کریں اور ہم اپنا کریں۔وہ کسی بھی صورت میں اننت ناگ سیٹ میں دلچسپی نہیں رکھتے تھے۔“
