امت نیوز ڈیسک //
سرینگر: جموں وکشمیر پولیس نے لوگوں سے ان شرپسند عناصر سے ہوشیار رہنے کی اپیل کی ہے جو بغیر اجازت کے سوشل میڈیا پلیٹ فارمز پر ڈائریکٹر جنرل آف پولیس آر آر سوین کے ساتھ تصویریں پوسٹ کرتے ہیں۔
پولیس کے ایک ترجمان نے اپنے ایک بیان میں تفصیلات فراہم کرتے ہوئے کہا کہ ‘یہ بات سامنے آئی ہے کہ کچھ افراد کے پاس جموں وکشمیر کے ڈی جی پی یا پولیس کے دیگر اعلیٰ افسروں کی تصاویر ہیں، جو انہوں نے سماجی اور ثقافتی تقریبات میں شرکت کے دوران کھینچی ہوتی ہیں’۔
انہوں نے کہا کہ ‘ایسے افراد جو اتفاق سے ان تقریبات میں موجود ہوتے ہیں، ان تصویروں کو ڈی جی پی یا دوسرے اعلیٰ افسروں کی اجازت کے بغیر اپنے سوشل میڈیا اکاؤنٹوں پر اپلوڈ کرتے ہیں’۔
ترجمان نے کہا کہ کسی سماجی یا ثقافتی تقریب میں لی گئی کسی شخص کی تصویر اجازت کے بغیر عوامی ڈومین میں پوسٹ کرنا اچھے آداب میں شمار نہیں کیا جاتا ہے’۔
انہوں نے مزید کہا کہ ‘اگر تصویر کو کسی دوسرے کو ڈرانے کے لئے یا اس کو اتھارٹی کے ساتھ تعلق ظاہر کرکے حکومتی فوائد کا وعدہ کرنے کے لئے استعمال کیا جائے تو یہ سراسر مجرمانہ حرکت اور قابل سزا جرم ہے’۔
(یو این آئی )
