امت نیوز ڈیسک //
کولگام، جولائی: جنوبی کشمیر کے ضلع کولگام کے رزلو کنڈ علاقے میں جمعرات کی درمیانی شب آگ لگنے کے واقعے میں تین رہائشی مکانات جل کر خاکستر ہوگئے۔
اطلاعات کے مطابق کولگام کے دیوسر علاقے میں واقع ڈانگر پورہ رجلو کنڈ میں صبح تقریباً 2 بجے آگ لگی۔
رپورٹس میں بتایا گیا کہ واقعہ کے فوراً بعد مقامی لوگ موقع پر پہنچ گئے اور آگ بجھانے کی کوشش کی اور آگ پر قابو پالیا لیکن اس سے قبل لاکھوں مالیت کی املاک کو نقصان پہنچا۔ گھر کے مالکان کی شناخت گلزار احمد شان ولد غلام محمد شان، عاشق حسین شان ولد غلام احمد شان، عبدالرحمان وانی ولد غلام حسن وانی تمام رہائشی رزلو کنڈ کے طور پر ہوئی ہے۔
مقامی لوگوں کا کہنا ہے کہ آتشزدگی کے واقعے میں لاکھوں مالیت کی املاک جل کر خاکستر ہوگئیں جبکہ حادثے کی وجہ تاحال معلوم نہیں ہوسکی۔
