امت نیوز ڈیسک //
جموں: جل شکتی کے وزیر جاوید رانا کا کہنا ہے کہ جموں و کشمیر کی ریزرویشن پالیسی کا جائزہ لینے کے لیے کابینہ کی ایک ذیلی کمیٹی تشکیل دی جائے گی اور تمام متعلقین کے ساتھ بات چیت کی جائے گی۔
انہوں نے کہا کہ کابینہ نے اسمبلی میں لیفٹیننٹ گورنر کے خطاب کو بھی منظوری دی ہے۔
موصوف وزیر نے ان باتوں کا اظہار جمعہ کو یہاں وزیر اعلیٰ عمر عبداللہ کی قیادت میں منعقدہ کابینہ کی میٹنگ کے بعد نامہ نگاروں کے ساتھ بات کرنے کے دوران کیا۔
انہوں نے کہا: ‘ایل جی کے خطاب پر بات چیت ہوئی اور اس خطاب کو منظوری دی گئی’۔
ان کا کہنا تھا: ‘بے روزگاری جو ایک معاملہ ہے، کو دور کرنے کے لئے وزیر اعلیٰ نے تمام وزرا کو ہدایات دیں کہ وہ اس ضمن میں اپنے اپنے محکموں میں کام شروع کریں’۔
جاوید رانا نے کہا کہ آنے والے دو مہینوں میں جو چیزیں ہمارے الیکشن منشور میں تھیں، کو سامنے لایا جائے گا اور ان کو عملی شکل دی جائے گی۔
انہوں نے کہا کہ ہمارا الیکشن منشوراب ایک گورنمنٹ دستاویز بن گیا ہے۔
مختلف مضامین کے لئے ریفر کئے گئے لیکچررز پوسٹوں کے بارے میں پوچھے جانے پر ان کا کہنا تھا: ‘کابینی میٹنگ میں الگ الگ مضامین کے متعلق بات نہیں ہوئی البتہ ایس ایس بی اور جے کے پی ایس سی کو ریفر کئے جانے والے پوسٹوں کے بارے میں بات ہوئی’۔
انہوں نے کہا کہ ایک ٹائم فریم میں ان پوسٹوں کو مشتہر کرنے کے لئے کوشش کی جائے گی۔
ریزرویشن پالیسی کے متعلق آغا روح اللہ کے بیان کے بارے میں پوچھے جانے پر موصوف وزیر نے کہا: ‘اس ضمن میں کابینہ کی ایک ذیلی کمیٹی تشکئیل دی جائے گا جو تمام متعلقین کے ساتھ بات کرے گی اور جو بھی عوام کے مفاد میں ہوگا وہ کیا جائے گا’۔
انہوں نے کہا کہ میٹنگ میں ڈیلی ویجروں اور ایج ریلگزیشن کے بارے میں بھی بات چیت ہوئی۔(یو این آئی)
