امت نیوز ڈیسک //
سری نگر: منشیات کے خلاف جنگ کو جاری رکھتے ہوئے پولیس نے سری نگر کے پانتھہ چوک علاقے میں تلاشی کے دوران ایک رہائشی مکان سے کوڈین فاسفیٹ کی 290 بوتلیں برآمد کی ہیں۔ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ مصدقہ اطلاع پر کارروائی کرتے ہوئے پولیس اسٹیشن پانتھہ چوک کی ایک پارٹی نے عرفان احمد گنائی ولد منظور احمد گنائی ساکن اتھہ واجن کے رہائشی مکان کی تلاشی لی۔انہوں نے کہا کہ تلاشی تحصیلدار پانتھہ چوک (ایک گزیٹیڈ آفیسر) کی موجودگی میں لی گئی اور اس دوران کوڈین فاسفیٹ کی 290 بوتلیں برآمد کی گئیں۔
بیان میں کہا گیا کہ اس ضمن میں پولیس اسٹیشن پانتھہ چوک میں این ڈی پی ایس ایکٹ کے متعلقہ دفعات کے تحت ایک کیس درج کیا گیا اور مزید تحقیقات شروع کی گئیں۔انہوں نے مزید کہا کہ جموں و کشمیر پولیس منشیات کی اسمگلنگ کو روکنے اور کمیونٹی کی حفاظت اور بہبود کو یقینی بنانے کے لیے پرعزم ہے
