امت نیوز ڈیسک //
بارہمولہ کے اولڈ ٹاؤن میں کل دیر رات ایک پولیس چوکی کے قریب ایک دھماکے جیسی آواز سنی گئی جس کے ساتھ پولیس کو شبہ ہے کہ یہ ایک گرینیڈ حملہ ہے جبکہ اس واقعہ میں کسی جانی یا مالی نقصان کی اطلاع نہیں ہے۔
ایک بیان میں پولیس کے ترجمان نے کہا کہ 4 اور 5 مارچ کی درمیانی رات بارہمولہ کے اولڈ ٹاؤن پولیس چوکی کے پیچھے سے دھماکے جیسی آواز سنی گئی۔ بیان میں کہا گیا ہے کہ کوئی جانی یا مالی نقصان نہیں ہوا جبکہ پولیس پارٹیوں نے فوری طور پر بہن ایجنسیوں کے ساتھ مل کر علاقے کو گھیرے میں لے لیا۔
بیان میں کہا گیا کہ”تلاشی کے دوران، پولیس چوکی کے عقبی حصے سے، اس کی باؤنڈری وال کے باہر سے ایک گرینیڈ پن برآمد ہوا، جس سے معلوم ہوتا ہے کہ یہ ایک دستی بم حملے کی کوشش تھی۔ دستی بم پولیس چوکی کے اندر گرا اور پھٹ گیا۔ تاہم کوئی جانی یا مالی نقصان نہیں ہوا۔ امپیکٹ کریٹر کا ابھی تک پتہ لگانا باقی ہے،”۔
اس نے مزید کہا کہ مکمل انکوائری شروع کر دی گئی ہے، اور علاقے میں اور اس کے ارد گرد تلاشی کی کارروائیاں جاری ہیں۔
