امت نیوز ڈیسک //
شوپیان : پیپلز ڈیموکریٹک پارٹی (پی ڈی پی) کی صدر محبوبہ مفتی نے کہا ہے کہ ہندو اور مسلمان کے درمیان نفرت سے ملک کو نقصان ہوگا۔ انہوں نے اتر پردیش کے وزیر اعلیٰ یوگی آدتیہ ناتھ پر تنقید کرتے ہوئے کہا کہ انہوں نے ملک کا ماحول خراب کر دیا ہے۔ محبوبہ مفتی نے کہا کہ "بھارت میں ہندو اور مسلمان مل کر رہ رہے تھے، لیکن لوگوں کے ذہنوں میں نفرت کا زہر گھول کر انہیں ایک دوسرے کا دشمن بتایا جارہا ہے۔ محبوبہ مفتی نے کہا کہ نفرتی ماحول سے ملک کے حالات خراب ہوں گے۔
انہوں نے مزید کہا کہ فرقہ وارانہ ماحول بگاڑنے کی کوششوں سے ملک میں جاری ترقی کی رفتار سست ہوگی اور ملک کو کافی نقصان ہوگا۔ انہوں نے فرقہ وارانہ ہم آہنگی پر زور دیا۔ محبوبہ مفتی نے پڑوسی ملک پاکستان کی مثال دیتے ہوئے کہا کہ ’وہاں بھی اسی طرح کا ماحول پیدا کیا گیا تھا، جس کی وجہ سے آج تک وہ ملک سنبھل نہیں پایا۔ اگر یہی صورتحال ہمارے ملک میں بھی جاری رہی تو آنے والے وقت میں مشکلات کا سامنا کرنا پڑے گا‘۔
واضح رہے کہ محبوبہ مفتی نے آج جنوبی کشمیر کے شوپیان ضلع کا دورہ کیا اور اس دورہ کے دوران انہوں نے ملک میں جاری فرقہ وارانہ انتشار پر افسوس کا اظہار کیا۔ انہوں نے بی جے پی کو شدید تنقید کا نشانہ بنایا۔
