امت نیوز ڈیسک //
پلوامہ : جموں و کشمیر پردیش کانگریس کمیٹی کے سینئر نائب صدر محمد انور بٹ نے پریس کانفرنس کرکے کے ایم ایل اے بانڈی پورہ نظام الدین بٹ پر شدید حملہ کیا۔ جموں و کشمیر پردیش کانگریس کمیٹی کے رہنماؤں کے درمیان اندرونی تنازعہ چل رہا ہے جو ایک دوسرے پر جموں و کشمیر میں پارٹی کی بگڑتی ہوئی صورتحال کےلئے ایک دوسرے پر الزام لگا رہے ہیں۔
محمد انور بٹ نے پریس کانفرنس کے دوران کہا کہ پارٹی ہائی کمان نے جموں و کشمیر کے لیے ضلعی صدر اور دیگر لیڈروں کو نامزد کیا ہے لیکن کچھ افراد پارٹی ہائی کمان کو گمراہ کر رہی ہیں جو کہ قطعی طور پر ناقابل قبول ہے۔ محمد انور بٹ نے ریاستی صدر طارق حامد قرہ پر طنز کرتے ہوئے کہا کہ وہ سیاست کی اے بی سی بھی نہیں جانتے اور عام لوگوں اور پارٹی کی اعلیٰ کمان کو گمراہ کررہے ہیں۔
یہ بات قابل ذکر ہے کہ محمد انور بٹ گزشتہ 40 سالوں سے انڈین نیشنل کانگریس سے وابستہ ہیں اور جموں وکشمیر میں کانگریس کے سب سے سینئر رہنما ہیں۔ جموں و کشمیر اسمبلی انتخابات کے بعد سے کانگریس میں اندرونی ناراضگی پائی جاتی ہے جبکہ اس صورتحال پر قابو پانے کےلئے متعدد سینئر رہنماؤں کی جانب سے کوششیں کی جارہی ہیں۔
