امت نیوز ڈیسک //
سری نگر /پی ڈی پی صدر محبوبہ مفتی نے اتوار کے دن کہاکہ مرکز کو احتیاط سے کام لینا چاہئے۔ اُسے کوشش کرنی چاہئے کہ بے قصور لوگوں میں بیگانگی کا احساس پیدا نہ ہو۔
اُنہوں نے ایکس پر پوسٹ میں کہاکہ حکومت ہند کو ملی ٹینٹوں اور سیویلینس میں فرق کرنا ہوگا۔ اُسے احتیاط کرنی ہوگی ورنہ بے قصور لوگ اور وہ لوگ جو ملی ٹینسی کے خلاف ہیں کہیں حکومت سے کٹ نہ جائیں۔ سابق چیف منسٹر نے کہاکہ خبر ہے کہ ہزاروں لوگوں کو گرفتار کرلیا گیا ہے اور عسکریت پسندوں کے ساتھ ساتھ عام کشمیریوں کے بھی مکانات ڈھائے جارہے ہیں۔
محبوبہ مفتی نے کہاکہ حکومت سے میری اپیل ہے کہ حکام کو احتیاط سے کام لینے کی ہدایت دی جائے۔ عام لوگوں پر مار نہ پڑے ورنہ اُن میں احساس بیگانگی پیدا ہوگا اور دہشت گرد پھوٹ ڈالنے اور خوف پیدا کرنے کے اپنے مقصد میں کامیاب رہیں گے۔
ایسے ہی حریت کانفرنس کے سربراہ میر واعظ عمر فاروق نے اتوار کے دن مرکز سے مطالبہ کیا کہ وہ پہلگام حملہ کے متاثرین کو انصاف دلانے کی کارروائی میں بے قصور کشمیریوں کو سزاء نہ دے۔
اُنہوں نے وادی میں کئی ملی ٹینٹوں کے مکانات ڈھائے جانے کے بعد یہ ریمارکس کئے۔ میر واعظ نے ایکس پر پوسٹ میں کہاکہ کشمیر نے اجتماعی طورپر سفاکانہ جرم کی مذمت کی ہے۔ خاطیوں کو کیفر کردار تک پہنچانا لازمی ہے۔ اندھا دھند گرفتاریاں اور مکانات ڈھائے جانے کی سوشل میڈیا پر زیر گشت ویڈیوز تکلیف دہ ہیں۔
حکام سے میری گزارش ہے کہ متاثرین کو انصاف دلانے کیلئے بے قصور کشمیری کنبوں کو سزاء نہ دی جائے۔
