امت نیوز ڈیسک //
سرینگر : جموں وکشمیر کے وزیر اعلیٰ عمر عبداللہ نے ’’یوم آزادی صحافت‘‘ کے موقع پر صحافیوں کی ہمت و عزم کو خراج عقیدت پیش کرتے ہوئے کہا کہ ’’ایک آزاد پریس متحرک جمہوریت کی سنگ بنیاد ہے۔‘‘ انہوں نے کہا کہ ’’ہمیں اس کی حفاظت صرف الفاظ سے ہی نہیں بلکہ عمل طور پر کرنی چاہئے۔‘‘
وزیر اعلیٰ عمر عبداللہ نے سماجی رابطہ گاہ ایکس پر اپنے ایک پوسٹ میں کہا کہ ’’عالمی یوم آزادی صحافت کے موقع پر ہم طاقت کے سامنے سچ بولنے والے صحافیوں کی ہمت اور عزم کو خراج تحسین پیش کرتے ہیں۔‘‘ عمر عبداللہ نے آزاد پریس کو متحرک جمہوریت کی سنگ بنیاد قرار دیتے ہوئےاپنے پوسٹ آزادی صحافت کی صرف الفاظ سے ہی نہیں بلکہ عملی طور پر مدد کرنے کی اہمیت پر زور دیا۔
واضح رہے کہ 3 مئی کو ہر سال عالمی سطح یوم آزادی صحافت منایا جاتا ہے۔ اس دن دنیا میں میڈیا کی عوام کے تئیں خدمات کو یاد کیا جاتا ہے وہیں اس دن کے منانے کا مقصد صحافیوں کو درپیش خطرات اور آزادی صحافت کی اہمیت کو اجاگر کرنا ہے۔ اس دن کی بنیاد 1993 میں اقوام متحدہ کی جنرل اسمبلی نے رکھی تاکہ دنیا بھر میں صحافت کی آزادی اور صحافیوں کے تحفظ پر توجہ دی جا سکے۔
بھارت میں صحافت کو ریاست کا چوتھا ستون مانا جاتا ہے۔ لیکن یہاں بھی صحافیوں کو پیشہ ورانہ ذمہ داریاں ادا کرنے میں کئی چیلنجز کا سامنا بھی رہتا ہے۔ صحافی، عوامی مسائل اور انتظامی اداروں کے بارے میں اطلاعات فراہم کرتے اور سچ کی تہہ میں جاکر اسے عوام تک پہنچاتے ہیں۔ بلکہ حکومت اور عوام کے مابین ایک پل کا کردار ادا کرتے ہیں اور اپنے فرائض کی ادائیگی کے دوران کئی ایک اپنی جان بھی گنوا دیتے ہیں۔
