امت نیوز ڈیسک //
کپواڑہ: شمالی کشمیر کے ہندواڑہ میں وزیر اعظم روزگار پیکیج کے تحت تعینات ملازمین نے آج ایک پریس کانفرنس کرکے ضلع انتظامیہ پر زور دیا کہ وہ ہندواڑہ کولنگام باغ کوارٹرز کی زیر تعمیر رہائشی عمارتوں کو فوری طور پر مکمل کرکے فلیٹس کو جلد از جلد الاٹ کرے۔
ملازمین کے نمائندے نے کہا کہ "ہم حکام سے مطالبہ کرتے ہیں کہ ان عمارتوں پر تیزی سے کام مکمل کیا جائے اور فلیٹس کو مرحلہ وار تیار کر کے سب سے پہلے اُن ملازمین کو فراہم کیا جائے جو اس وقت کرایہ کے مکانات میں رہ رہے ہیں۔ یہاں 18 عمارتیں تعمیر کی جا رہی ہیں جن میں سے 15 مکمل ہو چکی ہیں۔”
ملازمین نے ضلعی انتظامیہ، پولیس اور سیکیورٹی فورسز کی جانب سے دی گئی توجہ اور تعاون پر شکریہ ادا کیا۔ ساتھ ہی مقامی مسلم برادری کی محبت اور ہم آہنگی کو بھی سراہا۔ انہوں نے کہا کہ "ہم مقامی برادری کے شکر گزار ہیں جن کے تعاون کی وجہ سے ہم یہاں اپنے فرائض انجام دے رہے ہیں اور پرامن طور پر رہائش پذیر ہیں۔”
ملازمین نے واضح کیا کہ یہ صرف رہائش کا مسئلہ نہیں بلکہ تحفظ، وقار اور استحکام کا معاملہ ہے۔ کرایہ کے مکانات میں رہنے والے ملازمین مالی مشکلات کا سامنا کر رہے ہیں۔ انہوں نے کہا کہ ’ہم حکام سے ہمدردی اور فوری کارروائی کی اپیل کرتے ہیں۔ ہمارا مطالبہ ہے کہ محفوظ اور باعزت رہائش فراہم کی جائے۔ جس کےلئے ان فلیٹس کی فوری تکمیل اور مرحلہ وار الاٹمنٹ ضروری ہے‘
