اعجاز بابا / گاندربل:
گاندربل میں ایک پُراثر اور پروقار تقریب کے دوران جموں و کشمیر ٹیچرز فورم (JKTF) گاندربل نے مختلف سرکاری محکموں کے محنتی اور فرض شناس ملازمین کو ان کی عوامی خدمات اور بہترین کارکردگی کے اعتراف میں اعزازات سے نوازا۔
ٹاؤن ہال گاندربل میں منعقدہ اس تقریب میں ریونیو، میونسپلٹی، تعلیم اور ٹریفک سمیت کئی محکموں کے ملازمین کو ان کی بے لوث خدمات کے اعتراف میں توصیفی اسناد پیش کی گئیں۔ تقریب میں مختلف شعبہ ہائے زندگی سے تعلق رکھنے والے معززین نے شرکت کی۔
اس موقع پر میونسپل کونسل گاندربل کے ایگزیکٹو آفیسر مرزا آصف بیگ، معروف سماجی کارکن بلال وانی، جموں و کشمیر ٹیچرز فورم کے ایگزیکٹو رکن گلزار احمد، اور ضلعی صدر پیرازادہ ارشاد احمد کے علاوہ دیگر معزز مہمانوں نے بھی تقریب میں شرکت کی۔
سماجی کارکن بلال وانی نے تقریب سے خطاب کرتے ہوئے کہا کہ ٹیچرز فورم کی جانب سے مختلف محکموں کے محنتی ملازمین کو خراجِ تحسین پیش کرنے کا یہ اقدام قابلِ تعریف ہے۔ ایسے اقدامات نہ صرف ملازمین کے حوصلے بلند کرتے ہیں بلکہ ان میں مزید جذبۂ خدمت بھی پیدا ہوتا ہے۔ انہوں نے خاص طور پر میونسپلٹی ملازمین کا ذکر کرتے ہوئے کہا کہ صفائی، ستھرائی اور روزمرہ شہری خدمات میں ان کا کردار کلیدی حیثیت رکھتا ہے، اس لیے ان کی خدمات کو خصوصی طور پر سراہا جانا چاہیے۔
ٹیچرز فورم گاندربل کے ضلعی صدر پیرازادہ ارشاد احمد نے اپنے خطاب میں کہا کہ فورم ان تمام ملازمین کی خدمات کا اعتراف کرتا ہے جو خاموشی سے عوامی خدمت میں مصروف ہیں۔ یہ ہمارے لیے اعزاز کی بات ہے کہ گاندربل میں پہلی بار ٹیچرز فورم نے مختلف محکموں کے ان محنتی ملازمین کے اعزاز میں تقریب منعقد کی۔ یہ ایک چھوٹا سا مگر بامعنی قدم ہے تاکہ انتظامیہ کے ان گمنام ہیروز کی خدمات کو سامنے لایا جا سکے۔
تقریب کا اختتام خوشگوار ماحول میں ہوا جہاں ملازمین کو تعریفی اسناد پیش کی گئیں۔
