امت نیوز ڈیسک //
ضلع کپواڑہ کے قاضی آباد علاقے کے مختلف حصوں میں تیز ہوا نے تباہی مچا دی جس سے رہائشی ڈھانچوں، گاڑیوں اور سرکاری املاک کو بڑے پیمانے پر نقصان پہنچا۔ گزشتہ شام دیر گئے اس علاقے میں آنے والے اچانک آندھی نے مکینوں میں خوف و ہراس پھیلا دیا اور معمولات زندگی درہم برہم ہو گئے۔
مقامی لوگوں کے مطابق تیز رفتار ہواؤں کی وجہ سے کئی چھتیں اڑ گئیں، ٹین کی چادریں بکھر گئیں اور درخت جڑ سے اکھڑ گئے۔ کھلے علاقوں میں کھڑی کئی گاڑیوں کو اڑتا ہوا ملبہ لگنے سے نقصان پہنچا۔ بجلی کے کھمبے اور تاریں بھی متاثر ہوئیں جس کے نتیجے میں متعدد علاقوں میں بجلی کی فراہمی معطل ہوگئی۔
