امت نیوز ڈیسک //
کلگام، 6 اگست: جنوبی کشمیر کے ضلع کلگام کے کنڈ علاقے کے بالائی حصوں میں بدھ کے روز ایک خیمے پر درخت اور چٹان گرنے کے باعث کم از کم دو افراد جاں بحق جبکہ دو دیگر زخمی ہو گئے۔
ایک سرکاری اہلکار نے نیوز ایجنسی کشمیر نیوز آبزرور (کے این او) کو بتایا کہ یہ واقعہ اُس وقت پیش آیا جب تیز ہواؤں کے باعث ایک بڑا درخت اور چٹان خیمے پر آ گری، جس میں ایک خانہ بدوش خاندان مقیم تھا۔
اہلکار نے بتایا،”خاندان کے دو افراد موقع پر ہی جاں بحق ہو گئے،”۔
جاں بحق افراد کی شناخت محمد شفیع بوکر اور اُن کی بہو، ریشمہ بیگم، ساکنان راجوری کے طور پر ہوئی ہے، جو اس وقت کنڈ کے جنگلات میں مقیم تھے۔
پولیس نے واقعے کا نوٹس لے لیا ہے۔ (کے این او)
