امت نیوز ڈیسک //
ادھمپور، 7 اگست :جموں و کشمیر کے ضلع ادھمپور کے بسنت گڑھ علاقے میں جمعرات کو پیش آئے ایک المناک حادثے میں تین سی آر پی ایف اہلکار جاں بحق جبکہ دس سے زائد زخمی ہو گئے، جن میں پانچ کی حالت تشویشناک بتائی جا رہی ہے۔
سرکاری ذرائع نے کشمیر نیوز آبزرور (کے این او) کو بتایا کہ سی آر پی ایف کی گاڑی پہاڑی علاقے میں ایک مقام کی طرف جا رہی تھی کہ اچانک سڑک سے پھسل کر گہری کھائی میں جا گری، جس سے جانی نقصان ہوا۔
ایک افسر نے بتایا: "حادثے کے فوراً بعد ریسکیو آپریشن شروع کر دیا گیا، اور تمام زخمیوں کو جائے حادثہ سے نکال کر اسپتال منتقل کیا گیا۔ پانچ اہلکاروں کی حالت نازک ہے جنہیں جدید طبی سہولیات کے لیے منتقل کیا گیا ہے۔”
وفاقی وزیر ڈاکٹر جتندر سنگھ نے ایکس (سابقہ ٹویٹر) پر حادثے پر تشویش کا اظہار کیا۔
انہوں نے لکھا: "بسنت گڑھ-کندوا علاقے میں سی آر پی ایف گاڑی کے حادثے کی خبر افسوسناک ہے۔ گاڑی میں ہمارے بہادر جوان سوار تھے۔”
انہوں نے مزید کہا: "میں نے ابھی ڈپٹی کمشنر محترمہ سلونی رائے سے بات کی ہے، جو خود صورتِ حال کی نگرانی کر رہی ہیں اور مجھے باقاعدگی سے آگاہ رکھ رہی ہیں۔ ریسکیو اقدامات فوری طور پر شروع کیے گئے ہیں، اور مقامی افراد بھی رضاکارانہ طور پر مدد فراہم کر رہے ہیں۔ ہر ممکن مدد کو یقینی بنایا جا رہا ہے۔”
ذرائع کے مطابق، ڈپٹی کمشنر ادھمپور کی درخواست پر فوجی ہیلی کاپٹرز کو حرکت میں لایا گیا تاکہ شدید زخمی اہلکاروں کو فوری طور پر اسپتال منتقل کیا جا سکے۔ (کے این او)
