عظمی ویب ڈیسک
سری نگر : جموں و کشمیر کے لیفٹینٹ گور نر منوج سنہا اور وزیر اعلیٰ عمر عبد اللہ نے منگل کی صبح جھیل ڈل کے کناروں پر واقع شیر کشمیر انٹر نیشنل کنوکیشن سینٹر (ایس کے آئی سی سی) سے ترنگا یاترا کی قیادت کی۔ یہ ریلی باٹنیکل گارڈن میں اختتام پذیر ہوئی اور اس میں بڑی تعداد میں لوگوں نے شرکت کی۔ منوج سنہانے ایکس پر اپنے ایک پوسٹ میں کہا جھیل ڈل سے ترنگا یاترا کو جھنڈی دکھائی۔
انہوں نے کہا کہ ہزاروں لوگ فخر کے ساتھ قومی پرچم کے احترام میں اس یاترا میں شامل ہوئے، جو ہمارے اتحاد، فخر اور مشتر کہ شناخت کی علامت ہے۔ ان کا کہنا تھا ہم نے اپنے آباؤ اجداد اور مسلح جوانوں کو خراج تحسین پیش کیا جنہوں نے ترنگے کو پوری شان و شوکت کے ساتھ بلند رکھنے کے لیے اپنی جانیں قربان کر دیں۔ منوج سنہا نے کہا کہ آج کا دن ہماری عظیم قوم کی کامیابیوں کا جشن منانے کا دن ہے تاہم ہمیں اپنے فرائض کے بارے میں بھی سوچنا چاہیے اور اپنی کامیابیوں کو استوار کرنا چاہئے۔
انہوں نے کہا ہمیں فوج، سی آر پی ایف اور پولیس کے جوانوں کی قربانیوں کی بنیاد پر جدید اور خوشحال جموں و کشمیر کی عمارت کی تعمیر کا عزم بھی کرنا چاہیے۔ عمر عبداللہ نے اس موقع پر قومی پرچم کے اتحاد ، امن اور ہم آہنگی کے پیغام کو اجاگر کیا۔ انہوں نے کہا ترنگا تنوع میں ہندوستان کی طاقت کا مجسمہ ہے اور میں تمام لوگوں کو اس کے سیکولرازم اور بھائی چارے کے نظریات کو برقرار رکھنے کی اپیل کرتا ہے۔
