امت نیوز ڈیسک //
سرینگر، 03 ستمبر: حکام نے وادی کشمیر میں سنگم پر دریائے جہلم کی سطح بڑھنے کے بعد سیلابی الرٹ جاری کیا ہے۔ محکمہ آبپاشی و فلڈ کنٹرول کے مطابق پانی کی سطح تیزی سے بڑھ رہی ہے اور فی گھنٹہ ڈیڑھ فٹ تک اضافہ ریکارڈ کیا جا رہا ہے۔
چیف انجینئر شوکت حسین نے بتایا کہ تمام ٹیموں کو متحرک کیا گیا ہے، کمزور مقامات پر نگرانی جاری ہے اور ریت کے تھیلے سمیت احتیاطی اقدامات کیے گئے ہیں۔ انہوں نے کہا کہ کلگام کے ویچو نالہ میں معمولی شگاف آیا تھا جسے فوری طور پر پُر کر دیا گیا ہے۔
وزیراعلیٰ عمر عبداللہ نے آج صبح ایک ہنگامی اجلاس طلب کیا، جس میں اعلیٰ افسران کو ہر وقت چوکس رہنے کی ہدایت دی گئی۔ اسی دوران، عوام سے کہا گیا ہے کہ وہ پانی کے ذخائر کے قریب نہ جائیں اور مکمل احتیاط برتیں کیونکہ بارشوں کے سبب پانی کی سطح مزید بڑھنے کا خدشہ ہے۔
