امت نیوز ڈیسک //
سرینگر: اپنی پارٹی نے بدھ کے روز منتظر محی الدین کو فوری طور پر جماعت کی بنیادی رکنیت سے خارج کر دیا۔
خبر رساں ایجنسی کشمیر نیوز آبزرور کے مطابق، جموں و کشمیر اپنی پارٹی کی پارلیمانی امور کمیٹی کا اجلاس آج پارٹی ہیڈکوارٹر چرچ لین، سرینگر میں محمد دلاور میر کی صدارت میں منعقد ہوا۔
اجلاس کے دوران، کمیٹی نے پارٹی کے چیف ترجمان منتظر محی الدین کی جانب سے حال ہی میں دیے گئے غیر متعلقہ اور نامناسب بیانات کا سنجیدہ نوٹس لیا، جنہیں پارٹی کے مفاد کے منافی قرار دیا گیا۔
بیان میں کہا گیا، "تفصیلی غور و خوض کے بعد، پی اے سی نے متفقہ طور پر فیصلہ کیا کہ جناب منتظر محی الدین کو جموں و کشمیر اپنی پارٹی کی بنیادی رکنیت سے فوری طور پر خارج کیا جائے۔”
دریں اثنا، پارٹی نے اپنے تمام اراکین اور عہدیداران کے درمیان نظم و ضبط، اتحاد اور اجتماعی ذمہ داری کو برقرار رکھنے کے عزم کا اعادہ کیا۔ — (کے این او)
