امت نیوز ڈیسک //
سری نگر، 19 اکتوبر: جنوبی کشمیر کے ضلع اننت ناگ کے کوکرناگ علاقے سے تعلق رکھنے والے قبائلی رہنما چودھری ہارون کھٹانہ نے پیپلز ڈیموکریٹک پارٹی (پی ڈی پی) سے استعفیٰ دے دیا ہے۔
کھٹانہ نے خبر رساں ایجنسی کشمیر نیوز آبزرور سے بات کرتے ہوئے کہا کہ انہوں نے پارٹی کی جانب سے کیے گئے کچھ “غلط فیصلوں” کی وجہ سے استعفیٰ دینے کا فیصلہ کیا ہے۔
انہوں نے کہا، "جی ہاں، میں نے پارٹی سے استعفیٰ دیا ہے کیونکہ پی ڈی پی کے کچھ فیصلے میرے علاقے کے عوام کے مفاد میں نہیں تھے۔”
چودھری ہارون نے مزید کہا کہ فی الحال ان کا کسی دوسری سیاسی جماعت میں شمولیت کا کوئی ارادہ نہیں ہے، تاہم وہ مناسب وقت پر اپنے آئندہ سیاسی لائحہ عمل کا فیصلہ کریں گے۔
قابلِ ذکر ہے کہ حالیہ حلقہ بندی کے بعد اننت ناگ ضلع کا کوکرناگ اسمبلی حلقہ قبائلی (شیڈولڈ ٹرائب) کے لیے مخصوص کیا گیا ہے۔
ذرائع کے مطابق، پی ڈی پی نے حال ہی میں قبائلی رہنما چودھری طالب کو کوکرناگ حلقہ انچارج مقرر کیا تھا، جس کے بعد چودھری ہارون کے حامیوں میں ناراضگی پائی جا رہی تھی۔
