امت نیوز ڈیسک //
سرینگر: نیشنل کانفرنس کے صدر ڈاکٹر فاروق عبداللہ نے ہفتہ کو انکشاف کیا کہ بھارتیہ جنتا پارٹی (بی جے پی) نے ان کی جماعت سے رابطہ کر کے راجیہ سبھا انتخابات میں چوتھی نشست کے لیے ایک "ڈیل” کی پیشکش کی تھی۔
نوائے صبح میں نامہ نگاروں سے گفتگو کرتے ہوئے، فاروق عبداللہ نے خبر رساں ایجنسی کشمیر نیوز آبزرور کے مطابق کہا کہ "سات ووٹ بی جے پی کو دینے کا کوئی سوال ہی پیدا نہیں ہوتا۔ اگر ایسا ہوتا تو ہمارے امیدوار کو 21 ووٹ کیسے ملے؟”
انہوں نے کہا کہ نیشنل کانفرنس نے بی جے پی کی پیشکش کو مسترد کرتے ہوئے چوتھی نشست پر بھی مقابلہ کرنے کا فیصلہ کیا۔
فاروق عبداللہ نے راجیہ سبھا انتخابات میں نیشنل کانفرنس کے امیدواروں کی حمایت کرنے والی تمام جماعتوں بشمول کانگریس، پیپلز ڈیموکریٹک پارٹی (پی ڈی پی)، عوامی اتحاد پارٹی (AIP) اور آزاد امیدواروں کا شکریہ ادا کیا۔
قابلِ ذکر ہے کہ نیشنل کانفرنس کے تین امیدوار راجیہ سبھا انتخابات میں کامیاب ہوئے جبکہ بی جے پی نے حیران کن طور پر ایک نشست حاصل کر کے این سی کے امیدوار کو شکست دی۔(کے این او)
