امت نیوز ڈیسک //
جموں، 15 دسمبر : جموں و کشمیر کے ضلع اودھم پور کے ایک دور افتادہ جنگلاتی گاؤں میں پیر کی شام سیکورٹی فورسز اور ملی ٹینٹوں کے درمیان تصادم میں ایک پولیس اہلکار ہلاک ہو گیا، جبکہ ایک ملی ٹینٹ کے زخمی ہونے کا شبہ ظاہر کیا جا رہا ہے، حکام نے بتایا۔
حکام کے مطابق فائرنگ کا سلسلہ رک گیا ہے تاہم علاقے کو سخت سیکورٹی حصار میں لے لیا گیا ہے اور تمام ممکنہ فرار کے راستے بند کر دیے گئے ہیں تاکہ علاقے میں موجود مسلح افراد کو قابو میں کیا جا سکے۔
یہ تصادم مجالتہ علاقے کے گاؤں سوان میں اس وقت شروع ہوا جب سیکورٹی فورسز نے تین ملی ٹینٹوں کی موجودگی کی اطلاع ملنے پر تلاشی آپریشن شروع کیا۔
انسپکٹر جنرل پولیس جموں بھیم سین توتی نے کہا کہ پولیس کو مصدقہ اطلاع ملنے کے بعد مسلح افراد سے رابطہ قائم ہوا۔ انہوں نے بتایا کہ پولیس کے اسپیشل آپریشنز گروپ (ایس او جی)، فوج اور سی آر پی ایف کی مشترکہ ٹیم آپریشن میں شامل ہے۔
ایک اور بیان میں آئی جی پی نے کہا کہ ایک نہایت محدود ایس او جی ٹیم نے ملی ٹنٹوں کا سامنا کیا، تاہم اندھیرے اور دشوار گزار علاقے کے باعث جنگلات میں تلاشی میں مشکلات پیش آ رہی ہیں۔
حکام کے مطابق شام تقریباً 6 بجے ہونے والے اس تصادم میں ایک ایس او جی اہلکار زخمی ہوا جو بعد میں زخموں کی تاب نہ لاتے ہوئے ازجان ہو گیا۔ ابتدائی فائرنگ میں ایک مسلح شخص کے زخمی ہونے کا بھی شبہ ہے۔
آپریشن کو رات کے وقت معطل کر دیا گیا ہے اور منگل کی صبح دوبارہ شروع کیا جائے گا۔ علاقے میں مزید فورسز تعینات کر دی گئی ہیں تاکہ گھیراؤ مضبوط بنایا جا سکے۔
