امت نیوز ڈیسک //
پونے : سابق مرکزی وزیر اور کانگریس کے سینئر لیڈر سریش کلماڈی کا منگل کی صبح 81 سال کی عمر میں انتقال ہوگیا۔ یہ اطلاع کلماڈی کے دفتر سے جاری ایک ریلیز میں دی گئی۔ انڈین اولمپک ایسوسی ایشن کے سابق چیئرمین پونے کے دینا ناتھ منگیشکر اسپتال میں زیر علاج تھے۔ انہوں نے طویل علالت کے بعد صبح تقریباً ساڑھے تین بجے آخری سانس لی۔
پونے سے سابق ممبر پارلیمنٹ اور ریلوے کے سابق وزیر کلماڈی نے پسماندگان میں بیوی، ایک بیٹا، بہو، دو بیٹیاں اور پوتے پوتیاں چھوڑے ہیں۔ ان کے سبھی بچے شادی شدہ ہیں۔ اطلاعات کے مطابق ان کا جسد خاکی کلماڈی ہاؤس، پونے کے ایرنڈوانے میں واقع ان کے گھر دوپہر 2 بجے تک رکھا جائے گا۔ پونے کے نوی پیٹھ میں واقع ویکنتھ اسمارک میں دوپہر 3:30 بجے آخری رسومات ادا کی جائیں گی۔
سریش کلماڈی کون ہیں؟
سریش کلماڈی نے کانگریس کے دور حکومت میں مرکزی وزیر کے طور پر خدمات انجام دیں۔ وہ کھیل سے بھی جڑے رہے اور اسی لیے انہیں کھیلوں کے منتظم کے طور پر جانا جاتا ہے۔ وہ سابق وزیر اعظم پی وی نرسمہا راؤ کی حکومت میں وزیر بنے تھے۔ مرکزی وزیر مملکت برائے ریلوے کی حیثیت سے انہوں نے ریلوے بجٹ بھی پیش کیا۔ پونے کے رہنے والے سریش کلماڈی نے سنہ 1960 کی دہائی میں نیشنل ڈیفنس اکیڈمی (این ڈی اے) میں تعلیم حاصل کی اور اس کے بعد پائلٹ کے طور پر بھارتی فضائیہ میں شمولیت اختیار کی۔ انہوں نے وہاں تقریباً چھ سال خدمات انجام دیں اور پھر سنہ 1974 تک راشٹریہ رکشا اکیڈمی (این ڈی اے) میں بطور ٹرینر خدمات انجام دیں۔ انہوں نے پاکستان کے خلاف سنہ 1965 اور سنہ 1971 میں لڑی گئی دو جنگوں میں بھی حصہ لیا۔
