جموں، 19 فروری : جموں و کشمیر اسمبلی کے اسپیکر وحید الرحمن پرہ کی جانب سے پیش کی گئی نجی رکن کی قرارداد کو منظور کر لیا ہے، جس میں جموں و کشمیر سے باہر کشمیریوں کے خلاف بڑھتے ہوئے نفرت انگیز جرائم کی سخت مذمت کی گئی ہے۔
پیپلز ڈیموکریٹک پارٹی (پی ڈی پی) کے پلوامہ سے منتخب رکن اسمبلی نے یہ قرارداد ملک کے مختلف حصوں میں کشمیری طلبہ اور تاجروں پر مبینہ حملوں اور ہراسانی کے واقعات میں اضافے کے تناظر میں پیش کی تھی۔
اسمبلی سیکریٹریٹ کی جانب سے جاری سرکاری مراسلے کے مطابق یہ قرارداد جموں و کشمیر قانون ساز اسمبلی کے قواعد و ضوابط کے تحت رول 179 کے تحت منظور کی گئی ہے۔
قرارداد میں تمام اقلیتوں کے خلاف نفرت پر مبنی جرائم کی شدید مذمت کرتے ہوئے حکومتِ ہند اور ریاستی حکومتوں سے مطالبہ کیا گیا ہے کہ وہ ایسے جرائم کی روک تھام، تحقیقات اور ملزمان کے خلاف قانونی کارروائی کو یقینی بنانے کے لیے فوری اور مؤثر اقدامات کریں اور قانون کا سختی سے نفاذ کریں۔
گزشتہ چند ہفتوں کے دوران مختلف ریاستوں میں کشمیری طلبہ اور تاجروں کو مبینہ طور پر نشانہ بنانے کے واقعات نے سیاسی حلقوں میں تشویش پیدا کی ہے، جس کے بعد حفاظتی اقدامات کو مضبوط بنانے اور جوابدہی کے نظام کو مؤثر بنانے کی آوازیں بلند ہو رہی ہیں۔
