امت نیوز ڈیسک //
ہبلی (کرناٹک): جموں و کشمیر کی ٹیم رنجی ٹرافی کے فائنل میں تاریخ رقم کرنے کے قریب ہے، اور اس اہم موقع پر ریاست کے وزیر اعلیٰ عمر عبداللہ ہبلی پہنچ گئے ہیں تاکہ ٹیم کی حوصلہ افزائی کر سکیں۔
ہوائی اڈے پر میڈیا سے گفتگو کرتے ہوئے انہوں نے کہا کہ یہ لمحہ جموں و کشمیر کے لیے باعثِ فخر ہے اور اگر ٹیم پہلی بار ٹرافی جیتنے میں کامیاب ہوتی ہے تو یہ ریاست کے مستقبل کے لیے سنگِ میل ثابت ہوگا۔
انہوں نے کہا کہ اب ملک کو اندازہ ہو رہا ہے کہ جموں و کشمیر میں باصلاحیت کرکٹرز کی کوئی کمی نہیں، مگر انہیں ماضی میں مناسب مواقع نہیں مل سکے۔ ان کا کہنا تھا کہ ریاست کے ایک یا دو کھلاڑی بھارتی ٹیم کی جرسی پہننے کے مستحق ہیں۔
وزیر اعلیٰ نے کہا کہ یہ ان کا ہبلی کا پہلا دورہ ہے اور وہ اس تاریخی میچ کے عینی شاہد بننا چاہتے ہیں۔ انہوں نے مزید کہا کہ کرکٹ ایک ایسا کھیل ہے جو تمام مذاہب کے لوگوں کو جوڑتا ہے، اور رمضان کے بابرکت مہینے میں اگر جموں و کشمیر کی ٹیم ٹرافی اپنے نام کرتی ہے تو یہ خوشی دوچند ہو جائے گی۔
