امت نیوز ڈیسک //
جموں، 27 مارچ: جموں و کشمیر قانون ساز اسمبلی میں جمعہ کے روز اُس وقت شدید ہنگامہ آرائی دیکھنے میں آئی جب کانگریس اور بھارتیہ جنتا پارٹی (بی جے پی) کے ارکان کے درمیان نعرہ بازی کے بعد ہاتھا پائی ہوگئی۔
ذرائع کے مطابق اسمبلی کے جاری اجلاس کے دوران کانگریس ارکان نے وزیر اعظم نریندر مودی کے خلاف نعرے بازی کی، جس پر بی جے پی ارکان نے سخت ردعمل ظاہر کیا۔ صورتحال اس وقت مزید کشیدہ ہوگئی جب بی جے پی کے رکن اسمبلی یودھویر سیٹھی نے کانگریس رہنما راہل گاندھی کے خلاف سخت ریمارکس دیتے ہوئے انہیں “پپو” کہا۔
اس بیان کے بعد کانگریس کے رکن اسمبلی عرفان حفیظ لون اور یودھویر سیٹھی کے درمیان تلخ جملوں کا تبادلہ ہوا جو دیکھتے ہی دیکھتے ہاتھا پائی میں تبدیل ہوگیا۔ ایوان میں موجود دیگر ارکان نے بیچ بچاؤ کرکے دونوں کو الگ کیا۔
ہنگامہ آرائی کے دوران ایوان کا ماحول انتہائی شور شرابے کا شکار رہا اور صورتحال کچھ دیر کے لیے “مچھلی بازار” کا منظر پیش کرنے لگی۔
واقعے کے باعث اسمبلی کی کارروائی کچھ وقت کے لیے معطل کرنا پڑی جبکہ مارشلز اور سینئر ارکان نے حالات کو قابو میں لانے کی کوشش کی۔
یہ واقعہ ایوان میں بڑھتی ہوئی سیاسی کشیدگی کو ظاہر کرتا ہے، جہاں اپوزیشن اور حکومتی ارکان کے درمیان تلخ جملوں اور نعرہ بازی نے کارروائی کو متاثر کیا۔
