امت نیوز ڈیسک //
جموں و کشمیر میں دیہی بنیادی ڈھانچے، خواتین کی بااختیاری اور زرعی ترقی کو اس وقت بڑا فروغ ملا جب مرکزی وزیر شیو راج سنگھ چوہان نے پردھان منتری گرام سڑک یوجنا کے تحت منظور شدہ سڑک منصوبوں کا منظوری نامہ وزیر اعلیٰ عمر عبداللہ کے حوالے کیا۔ یہ تقریب سری نگر کے ایس کے آئی سی سی میں منعقد ہوئی۔
ان منصوبوں کی مالیت تقریباً 3,566 کروڑ روپے ہے، جس کا مقصد جموں و کشمیر کے دیہی علاقوں میں رابطہ سڑکوں کو مضبوط بنانا ہے۔ اس کے علاوہ این آر ایل این کے تحت 24 ریاستوں اور مرکز کے زیر انتظام علاقوں کے لیے 4,568.23 کروڑ روپے سے زائد کی “مدر سینکشن” بھی جاری کی گئی۔
تقریب میں نائب وزیر اعلیٰ سریندر چودھری وزیر جاوید احمد ڈار ، قائد حزب اختلاف سنیل شرما سمیت ارکان پارلیمنٹ، ارکان اسمبلی اور سینئر حکام نے شرکت کی۔
اپنے خطاب میں چوہان نے کہا کہ وہ جموں و کشمیر خدمت کے جذبے کے ساتھ آئے ہیں۔ انہوں نے کہا کہ مودی کی قیادت میں مرکزی حکومت نہ صرف سڑکیں بنا رہی ہے بلکہ دلوں کو بھی جوڑ رہی ہے۔
انہوں نے مزید کہا کہ ایک ہی سال میں تقریباً 8,000 کروڑ روپے کے سڑک منصوبوں کی منظوری ایک تاریخی پیش رفت ہے۔ ان منصوبوں کا مقصد ہر گاؤں اور دور دراز بستی کو ترقی کے دھارے سے جوڑنا ہے تاکہ عوام کو تعلیم، صحت، منڈیوں اور روزگار کے بہتر مواقع میسر آسکیں۔
یہ اقدام جموں و کشمیر میں دیہی ترقی کو تیز کرنے اور عوام کے معیارِ زندگی کو بہتر بنانے میں اہم کردار ادا کرے گا۔
