امت نیوز ڈیسک //
سری نگر، 11 مئی: جموں و کشمیر کے وزیر اعلیٰ عمر عبداللہ نے پیر کے روز نئی دہلی میں مرکزی وزیر داخلہ امیت شاہ سے ملاقات کی، جس دوران جموں و کشمیر سے متعلق کئی اہم معاملات پر تفصیلی گفتگو کی گئی۔
ذرائع کے مطابق ملاقات میں ریاستی درجے کی بحالی، ریزرویشن سے متعلق معاملات اور ٹرانزیکشن آف بزنس رولز سمیت مختلف امور زیرِ بحث آئے۔
وزیر اعلیٰ عمر عبداللہ نے ملاقات سے قبل سری نگر میں صحافیوں سے گفتگو کرتے ہوئے کہا کہ ریاستی درجے کی بحالی ان کی حکومت کے لیے ایک اہم مسئلہ ہے اور وہ ہر ملاقات میں اس معاملے کو ضرور اٹھاتے ہیں۔
انہوں نے کہا: “ہم چاہتے تھے کہ ایک ہی ملاقات میں ریاستی درجہ بحال ہو جاتا، لیکن یہ عمل جاری ہے۔ جب بھی ہماری ملاقات ہوتی ہے، میں ریاستی درجے کا معاملہ ضرور اٹھاتا ہوں۔”
یہ ملاقات ایسے وقت میں ہوئی ہے جب جموں و کشمیر میں سیاسی اور انتظامی اختیارات سے متعلق بحث ایک بار پھر تیز ہو گئی ہے۔
