امت نیوز ڈیسک //
سری نگر، 11 مئی : سجاد غنی لون نے پیر کے روز پیپلز ڈیموکریٹک پارٹی (پی ڈی پی) اور نیشنل کانفرنس (این سی) پر سخت تنقید کرتے ہوئے الزام عائد کیا کہ دونوں جماعتوں نے حالیہ راجیہ سبھا انتخابات میں بھارتیہ جنتا پارٹی (بی جے پی) کو ایک نشست “تحفے” میں دی۔
سری نگر میں ایک پریس کانفرنس سے خطاب کرتے ہوئے سجاد لون نے کہا کہ جو سیاسی جماعتیں دوسروں پر بی جے پی کے قریب ہونے کا الزام لگاتی ہیں، انہی جماعتوں نے خود بی جے پی کو راجیہ سبھا کی نشست جتوانے میں مدد کی۔
انہوں نے الزام لگایا کہ پی ڈی پی نے “بدنیتی” کے تحت راجیہ سبھا انتخابات کے دوران اپنا مجاز پولنگ ایجنٹ مقرر نہیں کیا، جس کے باعث پارٹی اراکین کو بغیر نگرانی اپنی مرضی کے مطابق ووٹ ڈالنے کا موقع ملا۔
سجاد لون نے کہا، “پولنگ ایجنٹ کا کام یہ دیکھنا ہوتا ہے کہ اراکین اسمبلی کس کو ووٹ دے رہے ہیں۔ آر ٹی آئی دستاویزات سے انکشاف ہوا ہے کہ پی ڈی پی نے کوئی پولنگ ایجنٹ مقرر ہی نہیں کیا تھا۔ نتیجتاً تینوں اراکین نے اپنی مرضی کے مطابق ووٹ ڈالے کیونکہ ووٹنگ کی نگرانی کرنے والا کوئی موجود نہیں تھا۔”
پیپلز کانفرنس سربراہ نے وزیر اعلیٰ کے بیان پر بھی سوال اٹھاتے ہوئے کہا کہ اگر عمر عبداللہ کو واقعی آر ٹی آئی کے ذریعے معلوم ہوا کہ پی ڈی پی نے ایجنٹ مقرر نہیں کیا تھا، تو یہ بات ناقابل یقین ہے کہ ایک موجودہ وزیر اعلیٰ کو اتنے اہم معاملے کی جانکاری صرف آر ٹی آئی سے ملی۔
انہوں نے مزید دعویٰ کیا کہ راجیہ سبھا انتخابات میں مبینہ کراس ووٹنگ کے معاملے سے عوام کی توجہ ہٹانے کی کوشش کی جا رہی ہے۔
