امت نیوز ڈیسک //
سرینگر، 20 مئی: جموں و کشمیر حکومت نے سدھرا کے رائکا بانڈی علاقے میں قبائلی خاندانوں کے گھروں کی مسماری کے معاملے میں جنگلاتی حقوق ایکٹ 2006 کی مبینہ خلاف ورزیوں کی تحقیقات کے لیے ایک فیکٹ فائنڈنگ کمیٹی قائم کر دی ہے۔
محکمہ قبائلی امور کی جانب سے جاری حکمنامے کے مطابق کمیٹی کو ہدایت دی گئی ہے کہ وہ اس معاملے کی جانچ کر کے سات دن کے اندر اپنی رپورٹ پیش کرے۔
دو رکنی کمیٹی میں ڈائریکٹر ٹرائبل افیئرز محمد ممتاز علی، جے کے اے ایس، اور اسسٹنٹ ڈائریکرٹوریٹ آف ٹرائبل افیئرز مزمل حسن چوہدری، جے کے اے ایس شامل ہیں۔
حکمنامے میں کہا گیا ہے کہ کمیٹی سدھرا کے رایکا بندی علاقے میں قبائلی خاندانوں کے گھروں کی حالیہ مسماری کے دوران جنگلاتی حقوق ایکٹ 2006 کی کسی بھی ممکنہ خلاف ورزی کا جائزہ لے گی۔
واضح رہے کہ جنگلات، ریونیو اور پولیس محکموں کی مشترکہ انسداد تجاوزات کارروائی کے دوران کئی ڈھانچے منہدم کیے گئے تھے، جس کے بعد شدید احتجاج اور تنقید دیکھنے کو ملی۔
گجر-بکروال برادری کے افراد اور مختلف سیاسی رہنماؤں نے الزام لگایا تھا کہ یہ کارروائی بغیر پیشگی نوٹس کے انجام دی گئی اور اس دوران قبائلی حقوق کو نظر انداز کیا گیا۔
یہ حکم جموں و کشمیر حکومت کی ہدایات پر محکمہ قبائلی امور کی جانب سے جاری کیا گیا ہے۔
