امت نیوز ڈیسک //
شوپیاں، 4 جولائی: جنوبی کشمیر کے ضلع شوپیاں کے میمندر اور چھانہ پورہ علاقوں میں سیکیورٹی فورسز اور مشتبہ عسکریت پسندوں کے درمیان جھڑپ جاری ہے۔
اطلاعات کے مطابق کارروائی اس وقت شروع کی گئی جب سیکیورٹی ایجنسیوں کو خفیہ معلومات موصول ہوئیں اور سی سی ٹی وی فوٹیج میں ایک یا دو افراد کو پھیرن پہنے اور ہتھیار اٹھائے ہوئے دیکھا گیا۔ اس کے بعد بھارتی فوج، جموں و کشمیر پولیس اور سی آر پی ایف نے مشترکہ طور پر علاقے کا محاصرہ کر کے تلاشی مہم شروع کی۔
ذرائع کے مطابق محاصرے کے دوران سیکیورٹی فورسز کا عسکریت پسندوں سے آمنا سامنا ہوا، جس کے بعد فائرنگ کا تبادلہ شروع ہو گیا۔ بتایا جا رہا ہے کہ دو عسکریت پسند علاقے میں محصور ہیں، تاہم اس کی سرکاری طور پر تصدیق نہیں کی گئی ہے۔
پورے علاقے کو گھیرے میں لے لیا گیا ہے اور آپریشن تاحال جاری ہے۔ مزید تفصیلات کا انتظار ہے۔
