امت نیوز ڈیسک //
ماحولیاتی کارکن اور ماہرِ تعلیم سونم وانگچک کو 21 روزہ بھوک ہڑتال کے دوران طبیعت بگڑنے پر دہلی کے صفدرجنگ اسپتال منتقل کیا گیا، جہاں انہوں نے نس کے ذریعے سیال (آئی وی فلوئڈز)، او آر ایس اور دیگر ادویات لینے سے انکار کر دیا۔
اسپتال کے مطابق وانگچک میں پانی کی کمی، جسمانی کمزوری، پوٹاشیم کی سطح میں کمی اور میٹابولک بے ترتیبی کی علامات پائی گئی ہیں، تاہم ان کی حالت پر مسلسل نظر رکھی جا رہی ہے اور ڈاکٹروں کی ٹیم انہیں علاج قبول کرنے پر آمادہ کرنے کی کوشش کر رہی ہے۔
دوسری جانب وانگچک کی اہلیہ گیتانجلی جے انگمو نے اسپتال انتظامیہ سے مطالبہ کیا ہے کہ ان کی اجازت کے بغیر کوئی علاج نہ کیا جائے۔ انہوں نے طبی رپورٹیں فراہم کرنے اور وانگچک کو کسی دوسرے اسپتال منتقل کرنے کی بھی درخواست کی ہے۔ ان کا کہنا ہے کہ خاندان کو اسپتال منتقل کرنے سے قبل اعتماد میں نہیں لیا گیا تھا۔
